پارتیێن باکورێ کوردستانێ ئێریشا ل سەر ئالا کوردستانێ شەرمەزار دکن

پارتیێن باکورێ کوردستانێ ئێریشا ل سەر ئالا کوردستانێ شەرمەزار دکن

حەرەکەتا ئازادی، پارتییا ئازادی یا کوردستانێ (پاک) و پارتییا سۆسیالیستا کوردستانێ (پەسەکە) ئێریشا ل سەر ئالا کوردستانێ ب داخویانیەکێ شەرمەزار کرن و گۆتن: “ئەم سەرێ خوە ل ھمبەری چ ئێریشان ناتەوینن؛ ئالایێ کوردستانێ نرخا مەیا نەتەوەیییە. “

ل باژارێ دیاربەکرێ یێ باکورێ کوردستانێ دوھی دوشەمبێ 19ێ بەرفانبارا 2022یێ ھێزێن ئاساییشێ ئاڤێتن سەر ئاڤاھیێن پارتیا ئازادیا کوردستانێ (پاک)، پارتیا سۆسیالیستا کوردستانێ (پەسەکێ) و حەرەکەتا ئازادی و ئالایێن کوردستانێ یێن ل ئاڤاھیێن وان ئانین خوارێ.

د ڤێ دەربارێ دا پاک، پەسەکێ و حەرەکەتا ئازادی ئیرۆ ل دیاربەکر د کۆنفەرانسەکا رۆژنامەڤانی دا داخویانیەکا ھەڤبەش خواندن و ئەڤ کریار شەرمەزار کرن و گۆتن: “ئەم ڤێ بریارا سەردۆزگەرێ کۆمارێ یێ ئامەدێ و ھەلوەستا پۆلیسێن ئەمنییەتا ئامەدێ یا ل سەر حەرەکەتا ئازادی، پاک و پەسەکەیێ ژی، ئێریشێن بەرێ ژی، وەک ئێریشێن ل ھمبەری نرخا نەتەوەیی، نشتمانی یا گەلێ کوردستانێ، ئێریشەکس ل ھمبەر ئازادییا خوە ئیفادەکرنێ و ئازادییا خەباتا رێخستنی دبینن.”

داخویانیا پاک، پەسەکێ و حەرەکەتا ئازادی:

ئەم سەرێ خوە ل ھمبەری چ ئێریشان ناتەوینن؛ ئالا کوردستانێ نرخا مەیا نەتەوەیییە

ل سەر داخوازا سەردۆزگەرێ کۆمارێ یێ ئامەدێ و ب ئیزنا دادگەھا سولح و جەزایێ یا یەکەما ئامەدێ، پۆلیسێن ئەمنییەتا ئامەدێ، رۆژا 19/12/2022یێ ئاڤێتن سەر تەشکیلاتێن ئامەدێ یێن حەرەکەتا ئازادی، پاک و پەسەکەیێ.

وەکی تێ زانین ب مناسەبەتا رۆژا ئالایێ کوردستانێ حەرەکەتا ئازادی، پاک و پەسەکەیێ ل تەشکیلاتێن خوەیێن ئامەدێ ئالایێ کوردستانێ ھلدا بوون. و وەک نووچە د ھندەک مالپەران دا وێنەیێن ھلدانا ئالایێ کوردستانێ یێ حەرەکەتا ئازادی، پاک و پەسەکەیێ ھاتبوون بەلاڤ کرن.

ھندەک کەسێن نیژادپەرەست، د سۆسیال مەدیایێ دا ئەڤ وێنەیە کربوون سەبەبێ ئێریشا ل دژی ئالایێ کوردستانێ و حەرەکەتا ئازادی، پاک و پەسەکە ژی وەک ئارمانج نیشان دابوون.

سەردۆزگەرێ کۆمارێ یێ ئامەدێ  نیڤیسێن ڤان نیژادپەرەستان یێن ل سەر سۆسیال مەدیایێ وەک سکالا قەبوول کرییە و ب ئیزنا دادگەھا سولح و سزایێ یا یەکەما ئامەدێ ئیزنا لگەرینێ وەرگرتییە.

پۆلیسێن کو ئاڤێتنە سەر ئاڤاھییێن حەرەکەتا ئازادی، پاک و پەسەکەیێ ئەو بەلگەیا ئیزنێ نیشانی رێڤەبرێن ھەرسێ پارتی و حەرەکەتان دانە و دەست ب لێگەرینا ناڤ ئاڤاھییێن ھەرسێ پارتی و حەرەکەتان کرنە و گۆتنە، “ژ بەر کو وە ئالایێ کوردستانێ ل سەر تابەلایا رێکخستنا خوە ھلدایە، سەردۆزگەرێ کۆمارێ یێ ئامەدێ مۆلەتا لێگەرینا ناڤ ئاڤاھییێ دایە مە. ئەم ژ بۆ ڤێ سەدەمێ ھاتنە”. د دەما لێگرینێ دا پارێزەرێن پارتییێن مە ژی ل ئاڤاھییێن مە ئامادە بوون.

ھەرچقاس، سەدەما ڤان لێگەرینان وەک ئالایێ کوردستانێ ھاتبە نیشاندان ژی، پۆلیسان، ل سەر ئەمرێ سەردۆزگەری، دەست دانینە سەر ھەموو کۆمپیتور، دۆکومانێن فەرمی، دۆسیا، پرتووک، کۆڤار، ئافیش و ئالایێن کوردستانێ و برنە ئەمنییەتا دییاربەکرێ.

پۆلیسێن ئەمنییەتا ئامەدێ جیھگرێ سەرۆکێ گشتی یێ پاکێ نوورووللاھ تیموور، سەکرەتەرێ گشتی یێ حەرەکەتا ئازادی مەتین پیرانی ژی ژ بۆ ئیفادەیێ لگەل خوە برن ئەمنییەتا دییاربەکرێ. پشتی کو ئیفادەیا وان ژ ئالییێ سەردۆزگەرێ کۆمارێ یێ ئامەدێ ڤە ھاتیە گرتن، نوورووللاھ تیموور د عەینی  شەڤێ دا، مەتین پران ژی د سپێدەیا رۆژا 20/12/2022یێ دا ھاتە بەردان.

ھەلبەتە کو ئێریش و قەدەغەیێن ل سەر ئالایێ کوردستانێ نە جارا یەکەمە کو پێک تێن. ل باکورێ کوردستانێ و ل ترکییەیێ گەلەک جاران ئالایێ کوردستانێ روو ب روویی ئێریش و قەدەغەیان بوونە. رۆژا 17ێ چلەیا پێشین ژ بەر کو ئالایێ کوردستانێ ھلدانە، بەرپرسێن CNK ژییان تیموورتاش و شەرزان کلچاسلان ژی ل ئامەدێ ھاتنە دەستەسەر کرن و ھینا ژی نەھاتنە بەردان. ئەم ڤێ بریارا سەردۆزگەرێ کۆمارێ یێ ئامەدێ و ھەلوەستا پۆلیسێن ئەمنییەتا ئامەدێ یا ل سەر حەرەکەتا ئازادی، پاک و پەسەکەیێ ژی، ئێریشێن بەرێ ژی، وەک ئێریشێن ل ھمبەری نرخا نەتەوەیی، نشتمانی یا گەلێ کوردستانێ، ئێریشەکا ل ھمبەر ئازادییا خوە ئیفادە کرنێ و ئازادییا خەباتا رێخستنی دبینن. ئەم ڤان ئێریشان، ڤان بریاران شەرمەزار دکن.

ئالایێ کوردستانێ نرخەکی ھەری مەزن یێ نەتەوەیی، نشتمانی یێ ھەموو کورد و  کوردستانییێن جیھانێیە. چ کەس نکارە ڤی نرخێ نەتەوەیی قەدەغە بکە. ئەم چ قەدەغەیێن ل سەر ئالایێ کوردستانێ قەبوول ناکن، ئەم ل ھمبەری چ ئێریشان سەرێ خوە ناتەوینن.

ئەم، قەدەغە، بێرێزی و ئێریشێن  دەولەتا ترکییەیێ و یێن نیژادپەرەستان یێن ل سەر ئالایێ کوردستانێ، شەرمەزار دکن.

ئالایێ کوردستانێ ھەروەھا ئالایێ فەرمی یێ ھەرێما فەدەرەیا باشوورێ کوردستانێیە ژی. ئالایێ کوردستانێ ل گۆری قانوونا بنگەھینا فەدەرەیا ئیراقێ ژی، ئالایەک فەرمییە کو ھەموو دەولەتێن جیھانێ ژی قەبوول کرنە.

گەلەک جاران سەرۆککۆمار و وەزیرێن دەولەتا ترکییەیێ، ل گەل ئالایێ ترکییەیێ، ب ئالایا کوردستانێ ژی ھەڤدیتنێن فەرمی ل گەل رایەدارێن ھەرێما کوردستانێ  کرنە.

پۆلیسێن ئامەدێ گۆتن ئەم  ژ بۆ ئالایێ کوردستانێ ھاتنە ل ناڤا ئاڤاھییێن رێخستنێن ھەرسێ پارتی و حەرەکەتان بگەرن ؛ لێ  د ئەنجامێ دا، ل گەل ئالایێن کوردستانێ دەست دانینە سەر ھەموو کۆمپیتور، دۆکومەنتێن فەرمی، کۆڤار و کەرەستەیێن دن یێن ل ھەرسێ ئاڤاھییان. ئەڤ ژی بنپێکرنا مافێ ئازادییا رامانی و ئازادییا خەباتا رێخستنییە.

بەلێ، ئالایێ کوردستانێ نرخا مەیا نەتوەیی یە و ئەم دێ ھەر و ھەر ھلدن.

ئەم سەرێ خوە ل ھمبەری چ ئێریشان ناتەوینن.

پوستێن ھەمان بەش