ھێزێن رووسی و ترکی گەرەکا چاڤدێریێ یا ھەڤبەش ل کۆبانێ کرن

ھێزێن رووسی و ترکی گەرەکا چاڤدێریێ یا ھەڤبەش ل کۆبانێ کرن

پشتی ئێریشێن داوی یێن ترکیێ ل سەر رۆژئاڤایێ کوردستانێ و باکورێ سووریێ، یەکەم گەرا چاڤدێریا ھەڤبەشا د ناڤبەرا ھێزێن رووسی و ترکی دا ل گوندێن کۆبانێ ھاتە کرن.

رەوانگەھا سووری یا مافێن مرۆڤان (SOHR) راگھاند، دوھی 19ێ بەرفانبارێ یەکەم گەرا ھەڤبەش د ناڤبەرا ھێزێن پۆلیسێن لەشکەری یێن رووسی و ھێزێن ترکیێ دا ل گوندێن کۆبانێ ھاتە کرن. گەرا چاڤدێریێ ژ گوندێ ئاشمێ یێ 20 کم دکەڤە رۆژئاڤایێ کۆبانێ دەست پێ کر و ل گوندێ تەل شیر یێ 4 کم نێزی کۆبانێ یە ب داوی بوو.

د گەرا ھەڤبەش دا 8 ترومبێلێن زرخی یێن رووسی و ترکی بەشدار بوون و 2 ھەلیکۆپتەرێن رووسی ژی ژ ئاسمان ڤە گەر دشۆپاندن.

پشتی ئێریشێن ڤێ داویێ یێن ترکیێ ل سەر رۆژئاڤایێ کوردستانێ و باکورێ سووریێ، ترکیێ ب بھانەیا خراببوونا رەوشا کەشوھەوای چەند جاران گەرێن ھەڤبەشێن لگەل پۆلیسێن لەشکەری یێن رووسی رەد کربوو.

گەرێن چاڤدێریێ یێن ھەڤبەش یێن رووسیا–ترکیا ل رۆژئاڤایێ کوردستانێ د چارچۆڤەیا رێکەفتنا سەرۆکێ رووسیا ڤلادیمیر پوتین و سەرۆککۆمارێ ترکیێ رەجەب تەییب ئەردۆگان یا 22یێ جۆتمەھا سالا 2019ێ ل باژارێ سۆچی یێ رووسی دا تێن کرن کو ژ بۆ راوەستاندنا ئێریشا ترکیێ ل سەر سەرێ کانیێ و گرێ سپی ھاتبوو کرن.

ترکیا و رووسیایێ ژ دەستپێکا مژدارا 2019ێ ڤە دەست ب گەرێن ھەڤبەش کرن، وەک تەدبیرەکێ ژ بۆ شۆپاندنا جێبەجێکرنا بەندێن رێکەفتنا “سۆچی 2019” ب تایبەتی مژارا ڤەکشینا شەرڤانێن ھەسەدێ 30 کم ژ سینۆرێ د ناڤبەرا سووریا و ترکیا دا.

پوستێن ھەمان بەش