ھەڤسەرۆکێ بەرێ یێ ھەدەپێ سەلاحەدین دەمیرتاش د دەربارێ ھلبژارتنان دا و نە کشفکرنا ئۆپۆزسیۆنێ یا بەربژێرێ سەرۆککۆماریێ دا داخویانیەک بەلاڤ کر. دەمیرتاش ل سەر حەسابا خوە یا تویتەرێ دیتنا خوە دبێژە و ل گۆرا خوە شیرەتا ل ئۆپۆزسیۆنا ھەیی دکە. دەمیرتاش ب ئیسرار بەحسا پاراستنا دەولەتا ترک دکە و ڤێ دەولەتێ وەک دەولەتا ھەڤبەشا 85 ملیۆنا ددە نیشاندان. راستێ ئەڤ ئەڤینا دەمیرتاش یا دەولەتێ گەلەک بەر ب باوەریێن خەتەرڤە دچە. دخوەیە ل سەر ئەڤینا کۆمارا ترکیا پێشبرکیەک د ناڤبەرا ئۆجالان و دەمیرتاش دا دەستپێکریە، کا دێ کی ئیسپات بکە پتر ئەڤیندارێ دەولەتێ یە.
داخویانیا دەمیرتاش ب ڤی ئاوایییە:
“ئەم دچن ھلبژارتنان دا کو ‘کورسیا’ ب ھێزا ھەری مەزنا جیھانێ، ب ئاوایەکی ستراتەژیک ب دەست بخن. دڤێت ئارمانجا مە ھەموویان ئەڤە بیت کو ئەم ڤێ مەقامێ رادەستی خوەدیێ وێ یێ راستەقینە، واتە رایا گشتی بکن. نیقاشا ل سەر ناڤان ب واتەیا دوورکەتنا ژ ئارمانجا کو من دیار کریە دهێت.
د ڤێ دەما هەستیار دا دڤێت ھەر ئاکتۆرەکی سیاسی یێ کو ژ دل و جان باوەریا خوە ب دەمۆکراسیێ تینە، بەرپرسیاریا ئاڤاکرنا دەولەتێ ژ نووڤە بگرە سەر ملێ خوە، چ کەسەکی ماف نینە کو کەسەکی ژ ڤێ قادێ دوور بخە.
ھەر کاراکتەرەک سیاسی، د ناڤ دە یێن کو د بن گەفا قەدەغەکرنا سیاسی یان ژی ھلوەشاندنێ دا نە، ژ بۆ کو وەلات دەرباسی دەمۆکراسیێ ببە، دڤێت ژ بۆ ئەرکێن کو بەریا ھلبژارتنێ یان پشتی ھلبژارتنێ بکەڤن سەر ملێ وی ئامادە بت.
ژ بۆ دیتنا سەردەما هەستیارا کو ئەم تێ دا نە وەک ھێز یان کورسی پارڤەکرنا فرسەندێن دیرۆکی یە. کۆمارا ترکیەیێ یا مە ھەموویانە، لەوما ئەرکێ مە ھەموویانە کو بەرپرسیاریا خوە ب جھ بینن و ژ بۆ بەرژەوەندیێن گەل فەداکاریێ بکن.
ئەرکا روومەتا مەیا گەلانە کو ئەم ل پەی ئیدەئالێن ئازادیێ بن، نە خەیالێن کورسیان.
یەکانە رێیا ئاڤاکرنا سبەرۆژێ ب ئاوایەکی ساخلەم سازکرنا دەمۆکراسیا تامە. ژ بەر ڤێ یەکێ ھەموو پارتی و رێڤەبەرێن سیاسی یێن کو باوەریا وان ب دەمۆکراسیێ ھەیە، پارچەیەکی سرووشتی یێ ڤێ پێڤاژۆیێ نە. نھا دڤێت داوی ل نیقاشێن قرێژ بێ ئانین و خەباتەکا خورت بهێت مەشاندن.
نھا دەما ل سەر ئەساسێ پرەنسیبا ھەڤ ھەمبێزکرنێ یە، نە دەما ژ ھەڤ دوورکەتنێ یە. ب ڤێ نێزیکاتیێ دێ ھەر کەس ب سەر بکەڤە و 85 ملیۆنان قازەنج بکە.”
تشتا کو دەمیرتاش دبێژە ئەڤە. گەلۆ پیدڤی شرۆڤەیەکی یە؟ یان ھەر تشت ڤەکریە؟
