لگەل کو سەرۆکێ شارەدارێ ستەنبۆلێ ئەکرەم ئیمامۆغلو ب دەنگێ کوردان بوو شارەدار ژی، ھەم ئەو ھەم ژی مێزەیا شەشالی د وارێ پرسا کورد دا بێدەنگیا خوە ددۆمینن. ھەم چاڤدێرێن سیاسی یێن ترک و ھەم ژی سیاسەتمەدارێن کورد د ڤێ بابەتێ دا بالێ دکشینن سەر گرنگیا دەنگێ کوردان و دبێژن؛ بێی کورد پەسەند بکن ھیچ کەسەک نکارە ببە سەرۆککۆمارێ ترکیێ.
پشتی سزایێ ل دژی ئەکرەم ئیماۆغلو ھاتە پەسەندکرن، بالانسا سیاسەتا ترکیێ ژی گوھەری. ژ نوو ڤە کەلەجانەک ھاتە ئەنیا ئۆپۆزسیۆنێ و کاندیدیا ئیمامۆغلو. لێ د ھەمان دەمێ دا ناکۆکیێن ل سەر دیارکرنا کاندیدییێ یا مێزەیێ شەشالی ژی بەردەوام دکن. تام د ڤێ پرۆسەیێ دا رۆژەڤا ھەری گەرم ژی چارەنووسا دەنگێ کوردانە کو ل ترکیێ تێ نیقاشاکرن. گەلۆ ئەڤ نەدیاری، دوورسەکنین و بێدەنگیا ئەنیا ئۆپۆزسیۆنێ یا ل دژی ئێریشێن ل سەر ھەدەپێ و نرخێن کوردان دێ باندۆرەکا چاوا بکە ل سەر دەنگێن کوردان؟
چاڤدێرێ سیاسی یاشار ئایدن دیار کر: “پارتیەکا کو دەنگێ کوردان وەرنەگرە، نکارە ھلبژارتنا سەرۆککۆماریێ ب ھێسانی قازانج بکە. نە تەنێ ئیمامۆغلو کەسەکی کو خواندنەکا سیاسی بکە ژی ڤێ یەکێ دبینە. ئەم دبینن کو ھەڤکێشەیا مێزەیێ شەشالی ب نیقاشێن کاندیدیێ تێک چوو. ھەم سەلاحەدین دەمیرتاش ھەم ئەحمەد تورک و ھەم ژی میتحەت سانجار د ڤی واری دا حەساسیەتێن دەنگدەرێن کورد تینن زمان. ئەز باوەر دکم ماسە پشتی کێشەیێن ناڤخوە چارەسەر بکە دێ گوھ بدە ڤان بانگان و ل گۆری وێ ژی دێ نەخشەرێیا خوە دیار بکە.”
ئەنیا کوردان ژی تام د ڤێ پرۆسەیا جدی و گوھەربار دا بالێ دکشینە سەر بەرژەوەندیێن کوردان و ناخوازن وەک سەردەمێن بۆری کورد بێنە خاپاندن و جارەکا دن مافێن کوردان ل دەرڤەیی دەستوورەکا نوو بێ ھشتن.
جیگرێ سەرۆکێ پەسەکێ بەهائەدین توران ژی دیار کر: “ئیمامۆغلو ب دەنگێ کوردان ھاتیە ھلبژارتن. لێ مخابن ل ساراچخانێ کۆمبوون بانگی کوردەکی ژی نەکرن نە بانگی ھەدەپێ کرن نە ژی یەکی دن. ئەوقاس نەھەقی ھات کرن ل کوردان مخابن دەنگ دەرنەخستن. پارتیێن شەشالی د دەرحەقێ کوردان دا ژی تشتەکی دەرناخن ھۆلێ نابێژن ئەم دێ زمانێ کوردی بکن زمانێ پەروەردەھیێ. کلیلا دەستهلاتێ د دەستێ کوردان دایە. وەک سیاسەتمادەرەکی کورد ب رایا من دڤێ کورد ھندەک تشتان بکن ماددەیێ بازارێ. ل ئالیێ کوردان کی چ دبێژە ل گۆری وێ راوەستن. وەکی دن بلا کورد دەنگێ خوە نەدن پارتیەکا دن ژی.”
ل ئالیەکی ژی ھەڤسەرۆکێ بەرێ یێ ھەدەپێ سەلاحەدین دەمیرتاش ژ بۆ چارەسەریا ناکۆکیێن میزەیێ شەشالی بانگ دکە دا کو داوی ل نیقاشێن کورسیێ کاندیدیێ بینن و شوونا وێ ل گۆر بەرژەوەندیێن ھەڤپاریێن ھەموو جڤاکێن ترکیێ کۆم ببن لگەل حەساسیەتێن کوردان.
