رەڤەندا کوردا ل پاریسێ، ل دژی ئێریشا سەر ناڤەندا چاندا کورد یا ئەحمەد کایا و کوشتنا 3 وەلاتیێن کورد، خوەپێشاندان ئەنجام دا.
ئیرۆ شەمبیێ 24ێ بەرفانبارا 2022یێ، جارەکا دن رەڤەندا کورد یا ل پاریسێ ل دژی ئێریشا سەر ناڤەندا چاندا کورد یا ئەحمەد کایا و کوشتنا سێ وەلاتیێن کورد و برینداربوونا سێ وەلاتیێن دن، خوەپێشاندان ئەنجام دا.
ئەڤە د دەمەکێ دایە کو دوھ 23یێ بەرفانبارا 2022یێ، کەسەکی تەمەن 69 سالی ل پاریسا پایتەختا فرانسایێ ب چەک ئێریشی ناڤەندا چاندا کورد یا ئەحمەد کایا و سەرتراشخانەکێ کر و د ئەنجامێ دا 3 کورد ھاتن کوشتن و 3 کەس ژی بریندار بوون.
وەزیرێ ناڤخوەیێ فرانسایێ گەرالد دارمانین دەربارێ ئێریشێ دا راگھاند، ب ئاوایەکی زەلال دیارە کو چەکدار کەسێن بیانی کرنە ئارمانج.
گەرالد دارمانین ئەشکەرە کر، ئێریشکار بەریا نھا شۆفێرێ ترێنێ بوویە و خانەنشین بوویە، “لێ بەلێ ب ئاوایەکی زەلال ئەم نزانن گەلۆ ئێریشکار ب تایبەتی خەلکێ کورد کریە ئارمانج یان نا”.
یەک ژ وان کەسێن کو د ئێریشا چەکداری دا ھات کوشتن، ھونەرمەندێ کورد میر پەروەرە.
ئێریشکار ھات دەستەسەرکرن و پشتی دەستەسەکرنا ئێریشکار و بەلاڤبوونا ھندەک زانیاریێن دەربارێ بوویەرێ دا، کوردێن نشتەجیێن فرانسایێ و بەشەک ژ وەلاتیێن فرانسایێ، ل دژی ئێریشێ دەست ب خوەپێشاندانێ کرن و ئالۆزی د ناڤبەرا ھێزێن ئەولەھیێ و خوەپێشاندەران دا دەرکەت.
