ئاکار و فەرماندارێن ئارتێشا ترکیێ گهیشتن سەر سینۆرێ رۆژئاڤایێ کوردستانێ

akar-rojava-kurdistan

وەزیرێ به‌رگریێ یێ ترکیێ هولوسی ئاکار و فەرماندارێن پلەبلندێن ئارتێشا ترکیێ گهیشتن سەر سینۆرێ رۆژئاڤایێ کوردستانێ.

ل گۆری ئاژانسا فەرمی یا نووچەیان یا ترکیێ، وەزیرێ به‌رگریێ یێ ترکیێ هولوسی ئاکار و فەرماندارێن پلەبلندێن ئارتێشا ترکیێ سەردانا سینۆرێ رۆژئاڤایێ کوردستانێ کرن و ب یەکینەیێن لەشکەری رە جڤیان.

دا زانین ژی، ئاکار سەردانا فەرمانداریا لەشکەری یا ئۆپەراسیۆنێن ترکیێ ل سووریێ کر و دەربارێ رەوشا سینۆر دە ئاگاهی وەرگرتن.

سەردانا ئاکار د دەمەکێ دە یە ترکیێ داخواز دکە کو هه‌سه‌ده‌ 30 کم ژ سینۆرێ ترکیێ دوور بکەڤە و گەفا دەستپێکرنا ئۆپەراسیۆنا لەشکەری ل دژی رۆژئاڤایێ کوردستانێ دخوە. ل ئالیێ دن ژی رووسیا و ئه‌مەریکا ل دژی ئۆپەراسیۆنێ نە و رووسیا هەول ددە کو پێوەندیێن د ناڤبەرا ترکیە و حکوومەتا سووریێ دە ئاسایی بکە.

وەزیرێ به‌رگریێ یێ ترکیێ هولوسی ئاکار دوهی شەمیێ راگهاند کو وەلاتێ وی ب رووسیایێ رە دانوستاندنان دکە، ژ بۆ ئاسمانێ باکورێ سووریێ د ئۆپەراسیۆنەکە دەرسینۆری یا گەنگاز دە ب کار بینە.

ئاکار ل ئەنقەرەیێ پشتی جڤینا داویا سالێ یا ژ بۆ نرخاندنا خەباتێن وەزارەتا به‌رگریێ یا ترکیەیێ د کۆنفەرانسەکە رۆژنامەڤانی دە گۆت: «ئەم ب رووسیایێ رە ل سەر هەموو مژاران د ناڤ دە دانووستەندنێ دە نە، ژ وان ژی ڤەکرنا قادا ئاسمانی».

ئاکار ل سەر پرسەکە دەربارێ ئەگەرا هەڤدیتنا وەزیرێن به‌رگریێ یێن ترکیە، رووسیا و رەژیما سووریێ دە ژی گۆت: «ئەنقەرە ژ بۆ پاراستنا ماف و بەرژەوەندیێن وەلاتێ خوە، ل گۆر رێکارێن گونجاو چ پێویست بە دکە و د ڤێ چارچۆڤەیێ دە پێوەندیێن خوە دکە».

هەر وها دیار کر ژی، ترکیە ت جاری هەڤدیتن و دانوستاندنان پشتگوهـ ناکە و ژ دیالۆگێ رە ڤەکرییە.

پوستێن ھەمان بەش