ئه‌نه‌كه‌سه‌: په‌یه‌ده رێ ناده‌ سەرکردەیێن مە د سێمالکا رە دەرباس ببن

Sêmalka

ئەنجوومەنا نشتمانی یا کورد (ئه‌نه‌كه‌سه‌) د داخویانیەکێ دە راگهاند، رێڤەبەرییا خوەسەر رێ نادە سەرکردەیێن وێ د دەریێ سینۆری یێ سێمالکا رە دەرباسی هەرێما کوردستانێ ببن.

سەکرەتەریا گشتی یا ئه‌نه‌كه‌سێ ئیرۆ یەکشەمێ د داخویانیەکێ دە گۆت، «ژ دەستپێکا سالا 2013 ڤە، سەرکردایەتیا هەرێما کوردستانێ دەریێ پێشابوورێ/سێمالکا، ل سەر بانگا ئه‌نه‌كه‌سێ ڤەکر، ب ئارمانجا سڤککرنا ئێش و ئازارێن گەلێ کورد ل سووریێ و هەموو گەلێن هەرێمێ، ژ بەر کو خەلکێ هەرێمێ ژ ئالیێ رێژیما سووریێ و گرووپێن چەکدار ڤە د دۆرپێچێ دە بوون».

د داخویانیێ دە هات گۆتن، «ئه‌نه‌كه‌سه‌ ل گەل گەلەک ئالیان هەرتم داخوازا پاراستنا ڤێ دەریێ سینۆری دکر، تا کو خزمەتا هەموو گەل و پێکهاتەیان بکە و دووری ئاژاندایێن سیاسی بە».

ئه‌نه‌كه‌س دبێژە: «لێ دەستهلاتدارێن په‌یه‌دێ، یێن کو دەری ژ ئالیێ سووریێ ڤە کۆنترۆل دکن، د چارچۆڤەیا فشارێن کو ل سەر ئه‌نه‌كه‌سێ فەرز دکە، رێ نادە ئەندامێن سەرکردایەتیا ئه‌نه‌كه‌سێ و بەرەیا ئاشتی و ئازادیێ د ڤێ دەری رە دەرباس ببن، ئەڤ ژی ل دژی رێزکێن مرۆڤی یێن هەری بنگەهینە».

ئه‌نه‌كه‌سێ نەهشتنا دەرباسبوونا ئەندامێن خوە ژ دەری رە ژ ئالیێ رێڤەبەرییا خوەسەر ڤە شەرمەزار کر، د هەمان دەمێ دە بانگ ل هەڤپەیمانیا ناڤدەولەتی و ئه‌مەریکایێ کر کو فشارێ ل سەر په‌یه‌دێ و رێڤەبەرییا خوەسەر بکن، تا کو سینۆرەکێ ژ ڤان بنپێکرنان رە دەینن و دەری بێ جوداهی بکەڤە خزمەتا هەر کەسی دە و تا کو ژ بۆ ئاژاندایێن خوە یێن سیاسی ب کار نەیینن».

دەریێ سێمالکا د ناڤبەرا هەرێما کوردستانێ و رۆژئاڤایێ کوردستانێ دە یە و ریەکە سەرەکە و گرینگ یا ئابووری، چوون و هاتنا خەلکێ، رێخستنێن مرۆڤی و یێن سەر ب نەتەوەیێن یەکگرتی ڤەیە.

پوستێن ھەمان بەش