سەرهاتیا کو ئیرۆ ئەمێ ژ وەرە باس بکن، نه ژ گۆتنێن مه‌زنانه و نەژی ژ وان چیرۆكانە یێن داپیرێن مە ل شه‌ڤێن سار و درێژ یێن زڤستانێ ژ مە رە دگۆتن هەیا کو ئەم بنڤن، ئەڤ سەرهاتی نه پەرچەیەکە ژ رۆمانه‌كی کو نڤیسەرەکی ژ ئاشۆپا خوە دروست كربه، ئه‌ڤ سەرهاتیا مالباتەک كوردپه‌روه‌ره كو ژ ئالیێ یەک ژ ئەندامێن ڤێ مالباتێ کو بوویه قوربانیا ئایدۆلۆژیا عەڤدللا ئۆجالان و پارتیا وى، ب رێیا ئیمەیلێ ژ مە رە شاندیە.
ناڤێ گوند، ناڤێ مالباتێ و تەڤ ئاگاهیێن دن ب گشتی ل جەم رووپەلا دارکا مازی پاراستینە، ژ بۆی کو ئەندامێن ڤێ مالباتێ ژ هۆڤیتیا پارتیا عەڤدللا دوور بن و راستی گەف و ترساندنا زێدەتر نەیێن.
دەما من ئه‌ڤ سەرهاتی خاندى، بیرا من ل ژیانا گه‌ریلاتیێ هات، راستەراست ب ده‌هان دیمه‌نێن دن هاتن به‌رچاڤێن من کو ئه‌ز ب خوە تێ دە به‌شدار بوومە، ئەڤ دەیمەنێن بوویە سەدەم كو پشتى 16 سالان من ده‌ست ژ پارتیا كاركه‌ران کشاندی، لێ هێشتا ژ به‌ر وان دیمه‌نێن دل ب ئێش و دژى مروڤاتیێ و كوردینێ ئه‌ز نه دکارم ب شه‌ڤ و نه ژی ب رۆژ رازێم گه‌ر حەبێن خەوەێ نەخۆم.
سەرهاتیا کو ئیرۆ ئەمێ ژ وە رە ڤەبێژن وێ ببە باشترین سەناریۆ ژ بۆی دەرهێنەرەک وێره‌ك كو فلمه‌كی یان كورته فلمه‌كی ل سەر هۆڤیتیا پارتیا عەڤدللا دروست بکە، فلمەکی ووسا کو ببە کاندید ژ بۆی ب دەست خستنا پرانینا خەلاتێن سینەمایێ.
ئەڤ سەرهاتی ب ڤی ئاوایە
ئه‌م مالباتەکا كوردپه‌روه‌را هه‌ژار بووین و مە ل گونده‌كی سەر ب رانیا ژیان دکر، گوندێ مه ل سه‌رده‌ما شۆره‌شێن ئیلۆن و گۆلانێ مینا خوارنگەهـ و ئۆتەلەکی بوو ژ پێشمەرگەیێن کوردستانێ رە، تەڤی هەژاریێ و زلم و زۆرداریا دەولەتا ئیراقێ ل سەر تەڤ گوندێن باشوورێ کوردستانێ، لێ گوندیێن مە سەرێ خوە نەتەواند و یا د شیان دە بوو ژ بۆی پێشمەرگەیان دکر، خوارن، ڤەخوارن و هەر پێویستیەکە دن کو دکارین دابین بکن بێی دودلی ددا پێشمەرگەیان.
پشتی سەرهلدانا پیرۆزا سالا 1991ێ و رزگاربوونا باشوورێ كوردستانێ، ل ڤێ پارچەیا وەلات، پەرلەمان و حكوومه‌ته‌ك كوردى هاتن ئاڤاکرن، دەبستان هاتن ئاڤاکرن و زارۆیێن مە چوون دبستانێ، حکوومەتێ رێیێن قێرکری برن گوندێن مە تەڤ خزمەتگۆزاریێن سەرەکە ژ مە رە دابین کرن و مە دەست ب ژیانەک دن کر.
پشتی دەستڤەبردانا ئاخا باکورێ کوردستانێ و پاشڤەڤەکشینا گەریلایێن پەکەکێ بۆ باشوورێ کوردستانێ و نیزیکبوونا وان ژ گوندێن مە، ئێدی هەر تشت تێک چوو، دیسا دەنگێ تۆپ و تەیاران ب گوهێن مە ئاشنا بوو، گوندێن مە بوون قادا شەرەکی کو ت پێوەندی پێ رە تونە بوو.
تەڤی ڤێ یەکێ، ژ بەر کو ئەم ل سەر رێیا کوردینیێ هاتنە پەروەردەکرن، مە ب دلخوازی پێسوازی ل گەریلایێن پەکەکێ کر، ئەم ووسا دفکرین کو ئەو ژی مینا پێشمەرگەیانن، ژ بۆی کوردستانێ تێدکۆشن و ریزێ ل چاند و کلتوورا کوردی دگرن، ل مالا کو نان لێ خوار ئێدی وێ وەکە مالباتا خوە تەڤ بگەرن، لێ هەر تشت بەرەڤاژی دەرکەت، ئەڤ ئەو وار بوو لێ نە ئەو بوهار بوو.
مە مالێن خوە کرن جیێ ڤەحەواندنا چەکدارێن پەکەکێ، داییکێن مە نان ژ دەڤێ مە دئینا دەر و دکر دەڤێ چەکدارێن پەکەکێ دە، ژ مە رە دگۆتن ئەڤ ژی مینا پێشمەرگەیان شەرڤانێن کوردستانێ نە، ژ بۆی کوردستان ئازاد ببە ل ڤرن، دڤێ ئەم وەکە زارۆکێن خوە ب وان رە تەڤ بگەرن.
پەکەکەیی ب کەچ و کورێن مە رە دجڤییان و دانوستاندن دكر، مە فێم نەدکر ئەو چ دکن، ئەم ووسا دفکرین پەکەکەیی کوردینیێ دکن، لێ راستی تشتەکی دن بوو، وان ژەهرا خوە دکر سەرێ کەچ و کورێن مە دە، ئەو ب ئایدۆلۆژییا خوە دخاپاندن و دکرن دوژمنێن باشوورێ کوردستانێ، ژ وان رە دگۆ ل باشوور ت تشتەکی ووسا تونە کو هوون شانازیێ پێ بکن، شانازیا هەری مەزن ئەڤە کو د ناڤا رەفێن مە دە ببن چەکدار.
چیرۆکا مەیا تراژدیک د مەها گولانا 2018ێ دە دەست پێ کر دەما خوشکا مە یا ب ناڤێ لەعلی وەندا بووی. ئەم ل هەر دەرێ ل پەی خوشکا خوە گەریاین، لێ مە ئەو نەدیت، پشتی 7 مەھان مە زانی کو ئەو تەڤلی پەکەکێ بوویە. ئەز ب داییکا خوە رە چووم جەم چەکدارێن پەکەکێ، داییکا من گەلەک هێڤی ژ وان کرن کو کەچا خوە ببینە، لێ دلێ وان ژ کەڤر بوو، نە رۆندکێن داییکا من و نەژی هێڤیێن وێ ت فێدە نەکر. وان دگۆت مە چ ئاگاهی ل سەر کەچا وە تونە، لێ مە یەقین دزانی ئەو لە جەم پەکەکێ یە و نیشانی مە نادن، داییکا من ب ڤێ سەدەمێ نەخوەش کەت.
ل هاڤینا سالا 2020ێ ب رێیا چەند کەسان ژ خەلکێ وێ هەرێمێ پەیامەک ب ڤی ئاوا ژ مە رە هات: “كچا وه ژ پەکەکێ بێزاربوویه، ئەو ژ پەکەکێ قوت بوویە و کاریە برەڤە، ل سینۆرێ سیدەکان ل زۆزانێن سنینێ هەوارا خوە برییە مالا مام حاجى مەحموودێ برادۆستى، لێ چەکدارێن پەکەکێ زوو ب ڤێ یەکێ زانیە، چەکدارێن پەکەکێ چوونە مالا حاجی مەحموود و ب زۆر خوشکا وە ژ مالا حاجی مەحموود ئانیە دەر و ئەو ب ئاوایەکی هۆڤانە ب وەریس گرێدایە، پشترە هەر ل وێ دەرێ، ب دووراتیا چەند سەد مەتران ب ئاوایەکی هەری هۆڤانە ئەو قەتل کریە.”
پشتى مە ئه‌ڤ نووچە بهیستی، ئەم چه‌ندین جاران چووین جەم چەکدارێن پەکەکێ كو هه‌ر ت نەبە بکارین جەنازەیێ خوشكا خوە وەرگرین، لێ وان هەرتم رەد دکر کارەکی ب ڤی ئاوا ئەنجام دابە. داوی جار چەکدارێن پەکەکێ ژ مە رە گۆت پێویست دکە ب یەک ژ بەرپرسێن وان یێن لەشکری ب ناڤێ عەگید رۆژهلات رە بپەیڤین، ئەڤ بو کو ئەم چوون گوندێ ئێندزە و ژ ور ژی بەر ب دۆلا باللێ ب رێ کەتین، ل ور ئەڤ بەرپرسێ پەکەکێ مە دیت.
دەما ئەم ب عەگید رۆژهلات رە ئاخڤتی و چیرۆکا خوە ژ وی رە ڤەگۆتی، ب ئاوایەکی پر بێ شەرمانە و ب ئاخافتنێن پر کرێت بەرسڤا مە دا، وی دخوەست مە بترسینە، ژ مە رە گۆت ئەڤ چەندین جارە ژ وە رە تێ گۆتن جەنازەیێ خوشکا وە نە ل جەم مەیە، ئەم ت کەسەکێ ب ڤی ناڤی ناس ناکن، هەرن و جارەک دن ڤەنەگەرن ژ بەر کو ئەم نزانن خوشکا وە ل کو دەرێ یە.
لێ ئەم پاشگەز نەبوون و مە گاڤ پاشدە نەئاڤێت، ئەڤ جارە مە هندەک ژ ریهسپیێن مالباتا خوە و یێن گوندێ خوە شاندن جەم ڤی بەرپرسێ پەکەکێ هەیا کو جەنازەیێ خوشکا مە رادەستی مە بکن، ب رێیا ڤان ریهسپیان عەگید رۆژهلات ئه‌م ئاگه‌هدار كرن گه‌ر هوون بخازن ته‌رمێ خوشكا خوە بستینن، دڤێ هوون 120 هەزار دۆلار بدن پەکەکێ. ئه‌م مالباتەک هه‌ژار بوون پەکەکێ ژی رەوشا مە دزانی، وان ب تەنێ ژ بەر ڤێ یەکێ ئەڤ ژ مە رە گۆت ژ بەر کو دزانی ئەم نکارن پەرە بدن وان، ل داویێ ژ مە رە گۆت هەرن، هەر دەما ئەڤ پەرە وە ئانی ڤەگەرن و جەنازەیێ خوە وەرگرن، گەر نا، ت جارەک دن نەیێن جەم مە.
دەمەکی درێژ دەرباس بوو، بالافرێن شەر ئێن دەولەتا ترکیێ دۆلا باللێ بۆمبه‌باران كر، د ئه‌نجاما وێ بۆمبه‌بارانكرنێ دە عەگید روژهلات و دو گه‌ریلایێن دن هاتن کوشتن. لێ ڤێ داویێ پەکەکێ راگهاند عەگید رۆژهلات ل مەها 5 یا سالا 2021ان ل مەتینایێ د شەرەکی دژوار دە ب لەشکرێ ترکیێ رە هەیا داوی فیشەک شەر کریە و پشترە شەهید کەتیە.
پشتى ڤێ بوویەرێ پەکەکێ ئه‌ز و برایێ من ب ڤێ یەکێ سووچبار کرن کو مە ب رێیا GPS جیێ عەگید روژهلات ژ ده‌وله‌تا ترکیێ رە ئەشکەرە کریە، پەکەکێ گەریلا شاندن سەر مالا مە ل گوند، ئەم ب بەخت بوون کو وێ رۆژێ ئەز و برایێ خوە ل سلێمانیێ بووین، ئەم چووبوون سەرەدانا خالتیکا خوە کو ب نەخوەشیا کۆرۆنایێ کەتبوو و رەوشا وێ پر خەراب بوو، ب شەڤ ئەم ل مالا کورێ خالتیکا خوە نڤستن، ئەم ب رێیا یەک ژ خەلکێ گوند هاتن ئاگەهدارکرن کو چەکدارێن پەکەکێ چوونە سەر مالا مە و گەر ئەم ڤەگەرن وێ بێی گۆمان هێین کوشتن.
ب نەچاری ئەم ل سلێمانیێ ماین، مە ب توندی خوە دپاراست، چه‌ندین جارا پەکەکێ داخاز ژ مه كر ئەم خوە تەسلیمى وان بكن، لێ ژ بەر کو مە دزانی ئەڤ پارتی و چەکدارێن وێ چ قاسی هووڤ و بێی رەحمن و گه‌ر ئەم خوە رادەستی وان بکن وێ دەملده‌ست مه بكوژن، مە خوە رادەست نەکر. پەکەکێ مالا مە ژ گوند دەر کر، ئەز و برایێ خوە نەچار ماین ب رێیا قاچاغ پەنابەری ئەورۆپایێ ببن.
بەلێ ئەڤ بوو سەرپێهاتیا پارێزەرەکی کورد کو نەچار مایە ژ بەر زۆلما پەکەکێ ژ کوردستانا ئازاد برەڤە و ل یەک ژ وەلاتێن ئەورۆپایێ وەکە گارسۆن ل رەستۆرانتێ کار بکە و ژ هەمبێزا داییک و ولاتێ خوە دوور بکەڤە.
