په‌كه‌كه ب دەرخستنا ئالۆزییان ل پاریسێ دخوازە وێنەیا کوردان رەش بکە
سیاسەتمەدارێ کورد عەبدولباست حه‌مۆ دەربارێ کارڤەدانێن توندێن ل فرانسایێ دە گۆت، «په‌كه‌كه دخوازە وێنەیا کورد و دۆزا گەلێ کورد ل جەم ئەورۆپییان و دۆستێن کوردان رەش بکە».
عەبدولباست حه‌مۆ دەربارێ بوویەرا ئێریشا رۆژا 23ێ ڤێ مەهێ یا ل سەر ناڤەندا چاندێ یا ئەحمەد کایا یا پاریسێ دە کو تێ ده 3 کورد هاتبوون کوشتن گۆت: «ل ئەورۆپایێ بەرێ ژی گەلەک جاران بوویەرێن توندیا ل دژی بیانییان روو دایە، نە تەنێ ل پاریسێ، لێ ل گەلەک وەلاتێن دن ژی، ژ بەر نە هەر کەسەک دکارە کەسێن بیانی قەبوول بکە، لێ ڤێ جارێ کورد مخابن بوون قوربانییا ڤێ کین و زکرەشیێ».
هەر وها گۆت: «لێ د هەمان دەمێ دە، خوەپێشاندانێن کو توندی نیشان دانە و ئالۆزی دەرخستنە ژی، وێنەیا کورد و دۆزا گەلێ کورد ل جەم ئەورۆپیان و دۆستێن کوردان رەش دکە».
حه‌مۆ گۆت ژی: «ئەڤ کارڤەدانێن تووژ و خراپکارییا کو ل پاریسێ هاتنە کرن، وێنەیەک نیشان دا کو کورد هۆڤن و نە یێن ئاشتی و دەمۆکراسیێ نە و نکارن ب دیالۆگ و دانوستاندنان داخوازا مافێن خوە بکن، ژ بەر ڤێ یەکێ ئەڤ کارڤەدان و خراپکاری، دکەڤن خزمەتا دژمنێن کوردان».
هەر وها گۆت: «کارڤەدانێن ل پاریسێ و بلندکرنا ئالایێن په‌كه‌كێ و وێنەیێن ئۆجەلان، بوویەرێن سالا 1993ان یێن ل ئالمانیایێ تینە بیرا مە، وێ دەمێ ژی ریێن ئالمانیایێ هاتن گرتن، ترێن هاتن سەکناندن و زیان گهیشت ئابۆریا وی وەلاتی، تەڤی کو ئالمانیا پێشوازی ل کوردان دکە، په‌كه‌كێ پشتی شەرێ چەکداری یێ سالا 1984ان کو گوند و باژارێن کوردان ڤالا بوون، په‌كه‌كێ کورد نەچار کرن کو کۆچبەری وەلاتێن وەک ئالمانیایێ ببن و ل ور ژی ئەو ژ خوە رە کرن وەک ئێزنگ و ژ بۆ بەرژەوەندیێن خوە ب کار ئانین، ئیرۆ ئەڤ بوویەرێن ل پاریسێ، دوبارەکرنا وان بوویەرێن ل ئالمانیایێ یە».
په‌كه‌كه ب بلندکرنا ئالایێن په‌كه‌كێ و وێنەیێن ئۆجالان، دخوازە نیشان بدە کو قەدەر و چارەنڤیسا کوردان د دەستێ ئۆجالان و شکەفتێن قەندیلێ دە یە
دا زانین ژی، «ئەڤ کریارێن کو ئیرۆ په‌كه‌كه دکە و ئەورۆپا دکە مەیدانا خوە یا شەر و خەباتێ، کوردان ژ ماف و داخوازا وان یا سەرەکە دوور دخە».
بال کشاندنە سەر وێ یەکێ کو «په‌كه‌كه ب بلندکرنا ئالێن په‌كه‌كێ و وێنەیێن عه‌بدوللا ئۆجالان، دخوازە نیشان بدە کو قەدەر و چارەنڤیسا کوردان د دەستێ ئۆجالان و شکەفتێن قەندیلێ دە یە، ئەڤ ژی تێ وێ واتەیێ کو رەڤەندا کورد ل ئەورۆپا ب تەمامی ب ئەرکێ خوە رانەبوویە و تەڤگەرا سیاسی یا کوردستانێ لاوازە، دڤێ رەڤەندا کورد و تەڤگەرا سیاسی یا کوردستانێ رێ نەدابا کو وێنەیا کورد وها بێ رەشکرن».
حه‌مۆ دەستنیشان کر ژی، «فرانسا دۆستا هەری نێزیکا کوردانە و سەرۆکێ فرانسایێ سەردانا پایتەختا کوردستانێ کریە و پشتەڤانیا گەلێ کورد و ئیرانێ دکە، په‌كه‌كه دخوازە فرانسا ب پرسگرێکێن ناڤخوەیی مژوول ببە، دۆزا گەلێ کورد، دۆزەکە ئاشتی، دەمۆکراسی و رەوایە، لێ په‌كه‌كه هەر تم کوردان دکشینە نەوالا تەرۆرێ و دخوازە دۆزا گەلێ کورد بخن د خزمەتا دژمنێن کوردان دە».
