نەشئەت زازا: پەکەکە ناخوازە ئارامیا سیاسی ل رۆژئاڤا چێببە

نەشئەت زازا: پەکەکە ناخوازە ئارامیا سیاسی ل رۆژئاڤا چێببە

ئەندامێ پۆلیتبورۆیا پارتیا دەمۆکراتا کوردستانێ -سووریا (پەدەکە-سێ) نەشئەت زازا ل سەر رەڤاندنا ئەندامێن پەدەکە-سێ راگھاند: “ژ دەستپێکا شۆرەشا سووریێ ھەتا نھا گرتنێن وھا بەردەوامن.”

ل باژارێ دێرکێ یێ رۆژئاڤایێ کوردستانێ، دو ئەندامێن پەدەکە-سێ یێن ب ناڤێن بلند مەلا ئیسمایل و حسێن سلێمان ژ ئالیێ ھێزێن سەر ب رێڤەبەریا خوەسەر ڤە ھاتن رەڤاندن.

نەشئەت زازا ژ باژارێ دۆرتموند یێ ئالمانیایێ بەشداری بولتەنا نووچەیان یا کوردستان24ێ بوو و ل سەر رەڤاندنا ئەندامێن پەدەکە-سێ ل باژارێ دێرکێ دیار کر: “ژ دەستپێکا شۆرەشا سووریێ ھەتا نھا گرتنێن وھا بەردەوامن، ھەروھا گرتن، کوشتن، ونداکرن ژ ھێلا پەکەکێ و ئاساییشا سەر ب وێ ڤە، یان ژی ئەڤ رێڤەبەریا ب سەر پەکەکێ ڤە ل کوردستانا سووریێ بەردەوامە.”

ل سەر ھەبوونا بەلگەیێن وان دەربارێ ڤان گۆتنان دا، نەشئەت زازا دیار کر: “نە تەنێ مە بەلگە ھەنە، ئەم ب خوە وەکە شەخس ژی، ئەندامێ سەرکردەتیا پارتیا دەمۆکراتا کوردستانێ – سووریێ، من پێنج هەیڤ د زندانێن وان دا دەرباس کریە، سێ جاران ژ ھێلا وان ڤە ھاتمە گرتن.”

نەشئەت زازا بال کشاند سەر دەما دانووستاندنێن سیاسی یێن ئالیێن کوردی و دیار کر کو د وێ دەمێ دا ھندەک رەحەتی ل ھەرێمێ چێبوو و گۆت: “لێ دیارە پەکەکە ناخوازە کو ئەڤ رەحەتیا سیاسی د ناڤا کوردستانا سووریێ دا چێببە.”

پوستێن ھەمان بەش