ھێزێن سووریەیا دەمۆکراتیک (ھەسەدە) ب بەشداریا ھەڤپەیمانیا ناڤدەولەتی دەست ب ئۆپەراسیۆنەکا نوو ل دژی شانەیێن رازایی یێن داعشێ ل دەڤەرێن تل حەمیس و ھۆلێ یێن ل پارێزگەھا حەسەکێ کر.
ھێزێن سووریەیا دەمۆکراتیک (ھەسەدێ) د داخویانیەکێ دا، دەستپێکرنا ئۆپەراسیۆنەکا نوویا ب ناڤێ “برووسکا جزیرێ” ل دژی شانەیێن رازایی یێن داعشێ ل ھەر دو دەڤەرێن تل حەمیس و ھۆلێ راگھاند.
دیار کر ژی، ئەڤ ئۆپەراسیۆن ژ رۆژا 29ێ بەرفانبارێ و ب بەشداریا ھێزێن ئاسایشێ ھێزێن ھەڤپەیمانیا ناڤدەولەتی یا ل دژی داعشێ ھاتیە دەستپێکرن. دیار کر ژی، ئۆپەراسیۆن ل دەڤەرێن تل حەمیس و ھۆلێ نە کو شانەیێن رازایی ژ وان دەڤەران ڤە ئێریشێ ل دژی کامپا ھۆلێ و باشوورێ قامشلۆ دکن.
ھەسەدێ د داویا داخویانیا خوە دا تەکەز کر، ئەڤ ئۆپەراسیۆنا کو د چارچۆڤەیا پێویستیەکا توند دا و وەک بەرسڤەکێ ژ بۆ ئێریشا داعشێ یا رۆژا 26ێ ڤێ مەھێ ل رەقایێ دهێت، ھەر وھا دێ ببە دەستپێکا ئۆپەراسیۆنێن ل دژی رێخستنا تەرۆریست د سالا نوو دا.
رۆژا 26ێ بەرفانبارێ ھەژمارەک گرتیێن داعشێ ژ بارەگەھا ھەسەدێ یا ل تاخا دریێ یا رەقایێ رەڤیابوون و پشترا ژی ئێریشێ وێ بارەگەھێ کرن، د ئەنجامێ دا 3 شەرڤانێن ھەسەدێ و 3 ئەندامێن ھێزێن ئەولەکاریا ھوندرین ھاتن کوشتن.
