ھێزێن رووسی و ترکی گەرەکا چاڤدێریێ یا ھەڤبەش ل دربێسیێ ئەنجامدا

ھێزێن رووسی و ترکی گەرەکا چاڤدێریێ یا ھەڤبەش ل دربێسیێ ئەنجامدا

ھێزێن رووسی و ترکی گەرەکا چاڤدێریێ یا ھەڤبەشا ل گوندێن دربێسیێ یێن رۆژئاڤایێ کوردستانێ کرن.

رەوانگەھا سووری یا مافێن مرۆڤان (SOHR) راگھاند، ئیرۆ 29ێ بەرفانبارێ ھێزێن پۆلیسێن لەشکەری یێن رووسی و ھێزێن ترکیێ ل گوندێ دربێسیێ گەرەکا چاڤدێریێ یا ھەڤبەش پێک ئانین.

گەرا چاڤدێریێ کو ب 4 زریپۆشان و 2 ھەلیکۆپتەرێن رووسی پێک ھاتبوو، ژ گوندێ شێرکێ رۆژئاڤایێ دربێسیێ دەست پێ کر و د گوندێن سینۆری یێن نێزیکی قامشلۆ را دەرباس بوو و پشترا ڤەگەریا جھێ ب رێ کەتیە.

پشتی ئێریش و گەفێن ترکیێ یێن ڤێ داویێ، گەرێن ھەڤبەش یێن چاڤدێریێ یێن ترکیا و رووسیایێ ژ بۆ دەمەکێ راوەستیابوون، لێ پشت را د رۆژا 19ێ بەرفانبارێ دا جارەکا دن گەرێن ھەڤبەشیێن ھێزێن پۆلیسێن لەشکەری یێن رووسی و ھێزێن ترکیێ دەست پێ کربوو و ل گوندێن کۆبانێ ھاتبوو کرن.

گەرێن چاڤدێریێ یێن ھەڤبەش یێن رووسی – ترکی ل رۆژئاڤایێ کوردستانێ د چارچۆڤەیا رێکەفتنا سەرۆکێ رووسیا ڤلادیمیر پوتین و سەرۆککۆمارێ ترکیێ رەجەب تەییب ئەردۆگان یا 22یێ جۆتمەھا سالا 2019ێ ل باژارێ سۆچی یێ رووسی دا تێن کرن کو ژ بۆ راوەستاندنا ئێریشا ترکیێ ل سەر سەرێ کانیێ و گرێ سپی ھاتبوو کرن.

ترکیا و رووسیایێ ژ دەستپێکا مژدارا 2019ێ ڤە دەست ب گەرێن ھەڤبەش کرن، وەک تەدبیرەکێ ژ بۆ شۆپاندنا جێبەجێکرنا بەندێن رێکەفتنا “سۆچی 2019” ب تایبەتی مژارا ڤەکشینا شەرڤانێن ھەسەدێ 30 کم ژ سینۆرێ د ناڤبەرا سووریا و ترکیا دا.

پوستێن ھەمان بەش