پارتیا دەمۆکراتا کوردستانێ د داخویانیەکە نڤیسکی دە بەرسڤا گۆتنێن زوبێر ئایدار و راپۆرتا مالپەرا “ئاوێنە” ل سەر گۆتنێن ڤی ئەندامێ رێڤەبەریا پەکەکێ ل دۆر بکوژێ کادرۆیا پەکەکێ ل سلێمانیێ ئاگیهان ئاکارسەل دا.
داخویانیا پەدەکێ ب ڤی ئاوا یە:
بەرسڤەکە کورت ژ بۆ زوبێر ئایدار و مالپەرا ئاوەنە
رۆژا 27/12/2022یێ مالپەرا “ئاوێنە” راپۆرتەک بەلاڤ کریە ل سەر گۆتنێن زوبێر ئایدار ئەندامێ رێڤەبەریا پەکەکێ یێن ژ بۆ تەلەڤزیۆنا پارتیا خوە، کو ئایدار بەحسا وی کەسی کریە یێ کو رۆژا 4/10/2022یێ چالاکڤانا پەکەکێ ئاگیھان ئاکارسەل ل ناڤا باژارێ سلێمانیێ کوشتیە.
ل گۆری وێ راپۆرتێ، زوبێر گۆتیە: (کەسێ کو ئاگیھان ئاکارسەل کوشتیە، ئەم ناس دکن و ئەم زانین چ گۆتیە و دخواست پشتی کوشتنا ئاگیھان برەڤە ھەولێرێ، لێ ھات گرتن.)
د دەستپێکێ دا و بەریا بەرسڤدانا کورت و کورمانجی بۆ گۆتنێن زوبێر ئایدار، جھێ کو بالا یەکی دکشینە ھەلوەستا مالپەرا “ئاوێنە”یە، کو وەک کەسەکی ژ بۆ خوە ھنگڤین د دارەکێ دا دیتبە، ل شوونا کو ھەرن ل سەر ھورگلیێن بوویەرا کوشتنێ لێکۆلینێ بکن، ل شوونا کو ھەرن ل ھورگلی و شەرتوومەرجێن جێبەجێکرنێ و فەرماندار و کەسێن ل پشت بوویەرێ بگەرن، ھاتنە بێبەختیان دخن ستوویێ ھەولێرێ. ھاتنە گۆتنەکا زوبێر کرنە مانشێتا راپۆرتا خوە، کو نەشەرتە راست بە ژی. ئاخر ئەو گۆتن ب خوە ژی، داخواز و نیەتەک بوویە و چێنەبوویە، پشترە کی دبێژە کو ئەو گۆتنا وی کەسێ کو ئاگیھان کوشتیە، راستە؟ و نە گۆتنا کەسێن ل پشت وی نە؟… ژ وێ ژی گرنگتر، ئەگەر وی کەسی ئەو گۆتن ژی کربە، ئەڤ یەک نیشان و دەلیلە ژ رق و کینەیا وان کەسێن کو ژێ را ل چەپکان ددن.
زوبێر و پارتیا وی ئەگەر خەما ئەنداما خوە خواربانا و ل راستیان گەریابانا، گەرەک بەرێ خوە دابانا دەسەلاتا سیاسی و ئەمنی یا جھێ کو ئاگیھان لێ ھاتیە کوشتن، کو ل بن دەسەلاتا وان و ل بەر چاڤێ وان ئەڤ کوشتن چێبوویە. جھێ پرسیارێیە، پەکەکە چما دەست ژ جھ و دەم و ھورگلیێن کوشتنا ئەنداما خوە بەردایە، دەست ژێ بەردایە کو کی ل پشت وێ کوشتنێیە و بکوژ چەک ژ کو ئانیە، لێ ھاتیە ب وێ یەکێ گرتیە کو بکوژی دخواست برەڤە؟!
“ئاوێنە” گۆتنێن زوبێر بەلاڤ کرینە کو دبێژە: “بکوژ گۆتیە ئەو ژ بۆ کوشتنا ئاگیھان ئاکارسەل چووبوو سلێمانیێ و (وانا) پەرە و ھەرتشتەک دابوون بکوژ.” ئەم ژی ل ڤر دپرسن، (ئەو کەسێن کو پەرە دانە بکوژ) کی نە و چما زوبەیر نەوێرە یان ناخوازە ناڤێ وان بێژە؟!!
پشترا، ئەگەر نییەتا بکوژ ھەبوو برەڤە ھەولێرێ، گەلۆ زوبەیر و پەکەکە دکارن ژ مە رە بێژن بکوژێن ئەندامێن وان یێن دن کی نە و ل کودەرێ نە؟.. ئەرێ بکوژێ کانی یەلماز بەرپرسێ پەکەکێ یێ ئەورۆپا و بەرپرسێ زوبەیری ب خوە ژی کییە و ل کودەرێیە؟
پارتیا زوبەیر (پەکەکە) خوەدی دیرۆکەکا رەشە د کوشتن و رەڤاندن و ھەولا ژناڤبرنا ئەندامێن خوە دا. نە دوورە کو ئەڤ گۆتنێن وان و دەرخستنا بەهانەیان و ئانینا ناڤێ ھەولێرێ، ھەولەکا دن بت ژ بۆ ڤەشارتنا لاپەرەکێ ژ دیرۆکا وانا رەش.
بەشێ رەوشەنبیری و راگھاندنێ یێ پارتیا دەمۆکراتا کوردستانێ
29/12/2022
