تۆرا سووریێ یا مافێ مرۆڤان کو بنپێکرنێن ل سەرانسەری سووریێ دا تێنە ئەنجامدان بەلگە دکە، د دو داخویانیێن جودا دا، بانگ ل ھێزێن سووریا دەمۆکراتیک کر کو سەرکردە و ئەندامەکی پارتیا دەمۆکراتا کوردستان- سووریا سەربەست بەردن.
حسێن سلێمان کو ئەندامێ کۆمیتا ناڤەندی یا پارتیا دەمۆکراتا کوردستان- سووریایە، د 28ێ بەرچلەیا سالا بووری 2022یێ ل باژارێ دێرکێ یێ رۆژئاڤایێ کوردستانێ ھاتیە رەڤاندن، ھەروەھا بلند مەلا ئیسماعیل ئەو ژی بەریا وێ رێکەفتێ ب رۆژەکێ ھاتیە رەڤاندن، بوون جھێ نەرازیبوون و شەرمەزرکرنا ئالیێن کوردی و سووری ژی، کو د دو داخویانیان دا تۆرا سووریێ رەڤاندنا وان شەرمەزار کر.
تۆرا ناڤبووری د داخویانیێن خوە دا مەترسیا خوە ل سەر چارەنڤیسا وان دا دیارکرن، و گۆت دبە کو راستی ئەشکەنجەیێ بهێن و تێکەڤن لیستەیا ونداکریێن ب ناچاری، کو 85 ژ سەدێ یا گرتیان راستی ھەمان چارەنڤیسێ تێن، لەوما بانگ ل هەسەدێ کر کو یەکسەر وان و ب ھەزاران گرتیان سەربەست بەردن و چارەنڤیسا وان ژ بۆ رایا گشتی ئاشکەرا بکن، و دەست ژ کریارێن گرتن و رەڤاندنێ بەردن.
ژ ئالیێ خوە ڤە ئەنجوومەنا نشتیمانی یا کوردی ل سووریێ ب توندی کریارێن پەیەدێ د رەڤاندنا سەرکردە و ئەندامێن ئەنجوومەنا نشتیمانی یا کوردی و پارتیێن سەر ب وێ ڤە شەرمەزار کر، و گۆت ئەڤ کریارێن ترساندنێ دھێلن خەلکێ کورد بەرەڤ دەرڤەیی وەلات ڤە بچن، ھەروەھا پەیەدە وەکە بەرپرسا رەڤاندن و دیارکرنا چارەنڤیسا وان دا دیارکرن، و بانگ ل ھەموو ئالیان کر کو فشارێ ل سەر رێڤەبریا پەیەدێ بکن.
ژ 28ێ بەرچلەیا 2022یێ، چەکدارێن پەیەدێ حسێن سلێمان ئەندامێ کۆمیتا ناڤەندی یا پەدەکە-سێ و بلند مەلا ئیسماعیل کو ئەندامێ ئەنجوومەنا ھەرێمی یا پەدەکە-سێ بوون رەڤاندن، تا نھا چارەنڤیسا وان نە دیارە، سەدەمێن رەڤاندنا وان و تۆمەتێن کو ل سەر وان ھاتنە سەپاندن، نە دیارن.
ژ دەما کو پەیەدێ دەستهەلاتداری ژ رێژیما سووریێ وەرگرتیە، بەردەوام سەرکردە، چالاکڤان، ئەندام و ئالیگرێن ئەنەکەسێ درەڤینە، ل گۆری چاڤدێرێن سیاسی ژی مەبەست ژێ تەرۆرکرنا سیاسییە.
