ژ ھەرێما کوردستانێ شاندەیەکا ژ رێڤەبەر و بەرپرسێن پارتیێن کۆموونیستا کوردستانێ و زەحمەتکێشێن کوردستانێ، ل دیاربەکرێ سەردانا DBP، PAK، PSK و ھندەک پارتی و رێخستنان کرن.
سەکرەتەرێ گشتی یێ پارتیا کۆمونیستا کوردستانێ در. کاوە مەحموود گۆت؛ ئەو دخوازن پرسگرێک ب رێیا ئاشتی و دەمۆکراسیێ بێنە چارەسەرکرن. ھەڤسەرۆکا گشتی یا پارتیا ھەرێمێن دەمۆکراتیک DBP سالیحا ئایدەنیز ژی گۆت؛ سەدەما فشارێن ل سەر ھەدەپێ، دەبەپێ و پارتیێن کوردستانی تونەکرنا دەسکەفتیێن کوردانە و ل ھەمبەری ڤان زەخت و فشاران دڤێت کورد زێدەتر نێزیکی ھەڤدوو ببن.
پشتی زندانیکرنا ھەڤسەرۆکێ گشتی یێ پارتیا ھەرێمێن دەمۆکراتیک (دەبەپێ) کەسکین بایندر و سیاسەتمەدارێن بەدەپێ، سەرۆک و رێڤەبەرێن پارتیێن کوردی سەردانا دەبەپێ دکن و پشتگریا خوە راگھاندن. ژ ھەرێما کوردستانێ ژی سیاسەتمەدارێن پارتیا کۆمونیستا کوردستانێ و پارتیا زەحمەتکێشێن کوردستانێ سەردانا دەبەپێ کرن. سەکرەتەرێ گشتی یێ پارتیا کۆمونیستا کوردستانێ در. کاوە مەحموود گۆت؛ ئەو دخوازن ھەموو پرسگرێکێن ل ناڤچەیێ ب رێیا ئاشتی و دەمۆکراسیێ بێنە چارەسەرکرن و ئەو ژی پشگریا ڤێ یەکێ دکن.
سەکرەتەرێ گشتی یێ پارتیا کۆمونیستا کوردستانێ در. کاوە مەحموود راگھاند: “ئارمانجا مەیا سەرەکە ئەوە کو ئەم ھەموو گاڤان باڤێژن ژ بۆ ژناڤبرنا توندوتیژیێ، وەکھەڤیا ھەموو گەل و نەتەوەیان، ئیستقرار، دا کو گەشەپێدانەکا تام د ناڤبەرا وەلات و نەتەوەیان دا بێ دەستوەردان د کارووبارێن دەولەتێن دن دا و خەباتا بکن کو ئاشتی ل سەر ئاستا رۆژھلاتا ناڤین پێک بهێت و ماییندە بت.”
شاندەیا پارتیێن کو ژ ھەرێما کوردستانێ ھات دیاربەکرێ، سەردانا پارتیا ئازادیا کوردستانێ (پاک)، پارتیا سۆسیالیستا کوردستانێ (پەسەکە) و ھندەک پارتی و رێخستنێن دن ژی کرن و دێ بەشداری ھندەک چالاکیان ژی ببن. ھەڤسەرۆکا گشتی یا دەبەپێ سالیحا ئایدەنیز گۆت؛ پشتی زندانیکرنا ھەڤسەرۆکێ گشتی یێ دەبەپێ کەسکین بایندر، سەردانا پارتیێن کوردستانی ھێزێ ددەت وان.
