ھەڤسەرۆکا گشتی یا پارتیا دەمۆکراتیکا گەلان (ھەدەپێ) پەرڤین بولدان دیار کر، ئەو دێ لگەل تفاقا کەد و ئازادیێ و ھەموو ھەڤالبەندێن خوە کاندیدی ژ بۆ ھلبژارتنا سەرۆککۆماریێ دەستنیشان کەن.
ھەڤسەرۆکا گشتی یا ھەدەپێ پەرڤین بولدان د چارەمین کۆنگرەیا ئاسایی یا رێخستنا پارێزگەھا ئیدرێ دا ئاخڤی و گۆت: “چاڤێ ھەر کەسی ل ھەدەپێ یە. دێ کاندیدی نیشان بدە یان نا؟ گەلۆ ئەو دێ پشتەڤانیا ھەڤپەیمانیا نەتەوی بکە یان نا؟ ستراتەژیا ھەدەپێ دێ وەکە ھلبژارتنێن ھەرێمی بت یان ژی ئارمانجەکا وێ یا نوو ھەیە؟ ما ئەو دێ ستراتەژیەک نوو دەستنیشان بکە؟”
بولدان گۆت ژی: “دوھی من ل قەرسێ داخویانی دا؛ من گۆت ھەدەپە دێ کاندیدێ خوە ئەشکەرە بکە و ب کاندیدێ خوە بەشداری ھلبژارتنێ بت. یەکانە مژارا کو ژ دوھ ڤە تێ نیقاشکرن ئەوە کو ھەدەپە دێ کاندیدی دەستنیشان بکە یان نا.”
ھەر وھا گۆت: “ئەز جارەکا دن دیار دکم کو ھەدەپە دێ لگەل هەڤپەیمانێن خوە کاندیدێ خوە دیار بکە. کاندیدبوونا ھەدەپێ، لگەل تفاقا کەد و ئازادیێ، تفاقا ژنان، تفاقا کوردان و تفاقێن ھێزێن دەمۆکراتیک، ھەلبەت دێ ھندەک خەیال و ستراتەژیێن وان یێن پاشەرۆژێ تێک ببە.”
بولدان تەکەزی ل سەر وێ یەکێ ژی کر: “ئەز دخوازم تەکەز بکم کو یێن کو ژ بۆ گەلێ کورد و دۆستێن وان زندان و گۆرستانان دبینن، مەحکوومی ونداکرنێ نە.”
