راکان جبووری، پشتی خیانەتا 16ێ ئۆکتۆبەرێ وەکە پارێزگارێ سەپاندی یێ کەرکووکێ هات دەستنیشانکرن، ژ دەما دەستبکاربوونا خوە وەکە پارێزگار پر زلم و ستەم ل کوردان کریە و هەر وەها هەژمارەک هەری زێدە یا کوردان نەچار کرینە ژ کەرکووکێ برەڤن، ل شوونا وان ژی عەرەبێن هاوردە ئاکنجی کرینە، هەری داوی ژی ب نڤیسارەک فەرمی خوەستیە 112 پەرچەیێن ئەردی ل سەر خزمێن خوە پارڤە بکە.
ل گۆر ئاگاهیێن تایبەت یێن پێگەها دارکا مازی، رۆژا 27/11/2022ێ بەشا ملک و زەڤی یا پارێزگەھا کەرکووکێ ب ژمارەیا 22612 نڤێسارەک ژ شارەداریا ناڤچەیا حەویجە رە شاندیە و تێ دە لیستەیەک ژ 112 پۆلیسێن کو ھەموو پاسەوانێن راکان جبووری پارێزگارێ کەرکووکێ نە هەیە، تێدە داخواز کریە پەرچەیەک ئەرد ل حەویجە ژ هەر یەک ژ وان رە بێ دایین.
ھەروھا د نامەیێ دە ھاتیە کو ل سەر پێشنیارا پارێزگار و سەرۆکێ لیژنەیا 419 کو د 24/11/2022ێ دە بریار ھاتیە دایین تەدبیرێن پێویست ژ بۆ شۆپاندنا ناڤێن د لیستەیێ دە بێن گرتن.
ئەڤ لیستە ب ژمارە 1 ب ناڤێ موختار ئەحمەد سەعید عەلی، برایێ راکان سەعید جبووری، پارێزگارێ سەپاندییێ کەرکووکێ دەست پێ دکە و ب ژمارە 112 ب ناڤێ حسێن عبد نەسیف کو دبە برایێ حەسەن عەبد نەسیف، قایمەقامێ ب وەکالەتێ ناڤچەیا دوبز کو پاش بوویەرێن 16ێ جووتمەها 2017ان ڤە، ل شوونا قایمەقامێ کورد ھاتیە سەپاندن، ب داوی دبە.
ل گۆر ئاگاهیێن دارکا مازی، لیژنەیا 419 بەرپرسیارە ژ بەلاڤکرنا ئەردان ل سەر گرتیان، پەنابەران و کارمەندێن دەولەتێ ل گۆری بریار و رێنمائیێن حکوومەتا فەدەرال.
د دەما بۆری دا ھەژمارەکا زێدە ژ زەڤیێن باشێن ناڤچەیا حەویجە ل سەر کەسێن نێزیکی پارێزگارێ فەرزکری یی کەرکووکێ راکان جبووری ھاتنە دابەشکرن و بەشەک ژ وان ژی بوونە پرۆژەیێن بازرگانی.
