تۆرا مافێن مرۆڤان يا کوردستانێ راگهاندیە، د دەما خوەپێشاندانێن چەند مەهێن بۆری یێن ئیران و رۆژهلاتێ کوردستانێ دە، هەری کێم 121 وەلاتیێن کورد جانێ خوە ژ دەست دانە.
تۆرا مافێن مرۆڤان يا کوردستانێ د راپۆرەکێ دە کو رۆژا 11ێ چلەیا 2023ان بەلاڤ کریە، دبێژە: «ئەو 121 وەلاتیێن کورد ل باژار و گوندێن رۆژهلاتێ کوردستانێ و ناڤچەیێن جودا یێن ئیرانێ ب دەستێ هێزێن ئەمنی و لەشکەرێن کۆمارا ئیسلامی یا ئیرانێ هاتنە کوشتن».
هنەک رێخستنێن دن يێن وارێ مافێن مرۆڤ دبێژن، هەژمارا کوشتیێن د خوەپێشاندانێن رۆژهلاتێ کوردستانێ دە زێدەترە ژ ڤێ هەژمارێ.
کۆمەلەیا چالاکڤانێن مافێن مرۆڤ رۆژا 10ێ کانوونا 2022ان بەلاڤ کربوو کو ل رۆژهلاتێ کوردستانێ و ئیرانێ ب گشتی 147 وەلاتیێن کورد د خوەپێشاندانان دە جانێ خوە ژ دەست دانە.
رێخستنا مافێن مرۆڤا ئیرانێ رۆژا 28ێ کانوونا 2022ان راگهاندبوو کو د خوەپێشاندانێن رۆژهلاتێ کوردستانێ دە ب گشتی 139 خوەپێشاندەر هاتنە کوشتن.
ل ئیرانێ و رۆژهلاتێ کوردستانێ، خوەپێشاندانێن نەرازیبوونێ رۆژا 17ێ ئیلۆنا 2022ان پشتی بوویەرا جانژدەستدانا ژینا ئەمینی کەچا کوردا 22 سالی دەستپێ کرن. ژینا پشتی کو ژ ئالیێ پۆلیسێ ئەخلاقێ ئیرانێ ڤە ل تەهرانێ هات دەستەسەرکرن، د بوویەرەکە پر ب گومان دە جانێ خوە ژ دەست دا. باڤێ ژینا دیبێژە، کەچا وی ژ ئالیێ پۆلیس ڤە هاتیە کوشتن، لێ بەلێ پۆلیس و حکوومەتا ئیرانێ وێ یەکێ رەد دکن.
