بەردەڤکێ سەرۆکۆمارێ ترکیێ دبێژە: ئەو د هەر دەمەکێ دە دکارن ئۆپەراسیۆنا بەژاهی ل سووریێ ئەنجام بدن.
بەردەڤکێ سەرۆکۆمارێ ترکیێ ئیبراهیم کالن ئیرۆ ژ رۆژنامەڤانان دا خویاکرن، گرێدایی ئاستا گەف و مەترسیێن ل سەر وان، ئەو دکارن د هەر دەمەکێ دە ئۆپەراسیۆنەکە بەژاهی ل سووریێ ئەنجام بدن.
دیار کر ژی، ترکیە ب ناڤبەینکاریا رووسیایێ دخوازە ب شامێ رە پێوەندیێن خوە ئاسایی بکە، لێ شام وەک مەرجێ سەرەکە یێ ئاساییکرنا پێوەندییان، ڤەکشینا هێزێن ترکیێ دانیە.
ئەڤ داخویانیێن کالن هەڤدەم ل گەل هەولێن ترکیێ یێن ئاساییکرنا پێوەندیێن خوە ب حکوومەتا شامێ رە تێن، د هەمان دەمێ دە ژی خەلکێ سووری ل ناڤچەیێن د بن کۆنترۆلا ترکیێ دە ل باکورێ سووریێ، پشتی جڤینا سێئالی یا د ناڤبەرا وەزیرێن به‌رگریێ یێن رووسیا، ترکیە و سووریێ د 28ێ مەها بۆری دە دەرکەتن خوەپێشاندانان و نەرازیبوونا خوە نیشان دان.
ژ ئالیەکی دن ڤە ژی، یاسین ئاکتای کو شێورمەندێ سەرۆکێ ئاک-پارتیێ و سەرۆکۆمارێ ترکیەیێ رەجەپ تاییپ ئەردۆگانە هەفتەیا بۆری گۆتبوو، دڤێ ترکیە ژ رێژیما سووریێ داخواز بکە کو حەلەب ژ بۆ دەمەکێ بکەڤە بن کۆنترۆلا وێ، تا کو بکارن ژ 1.5 هەتا 2 ملیۆن کۆچبەرێن سووریێ ڤەگەرینن.
