مهزلووم عەبدی: دبە کو ترکیە د سباتێ دە ل ئالیێ کۆبانی ئێریشی رۆژئاڤا بکە
فەرماندارێ گشتییێ هێزێن سووریەیا دەمۆکراتیک مهزلووم عهبدی راگهاند، «دبە کو ترکیە د مەها سباتێ دە ب رێیا کۆبانی ئێرشی رۆژاڤا بکە» و گۆت، ئەو ئاشتیێ ب ترکیێ رە دخوازن، لێ «ب تەمامی» ئامادەنە کو ل هەمبەر هەر ئێریشەکێ راوەستن. عهبدی هەروها گۆت، «ئەم ناخوازن ببن مەخدوورێ وێ یا کو ترکیێ نەکاریە پرسگرێکا خوە یا کورد چارەسەر بکە».
فەرماندارێ گشتییێ هێزێن سووریەیا دەمۆکراتیک (ههسهدێ) مهزلووم عهبدی د هەڤپەیڤینەکە ژ بۆ مالپەرا ئال مۆنیتۆر دە کو رۆژا دوشەمێ 16ێ چلەیا 2023ان هاتیە وەشاندن، ئاماژە ب بەردەوامیا گەفێن ترکیێ ل سەر رۆژئاڤایێ کوردستانێ کریە و راگهاندیە، ئەو گەفێن ترکیێ یێن پێکانینا ئێریشەکێ بۆ سەر رۆژئاڤایێ کوردستانێ جددی دبینن و تەکەز کر، ئەو ئەنقەرێ تەشویق دکن کو ل شوونا شەر ئاشتیێ هلبژێرە.
مهزلووم عهبدی دیار کر، ب تەخمینا وان ترکیە د مەها شباتێ دە دێ ئێریشی رۆژئاڤایێ کوردستانێ بکە و گۆت، «نابە ئەنقەرە کوردێن سووریێ جەزا بکە، ژ بەر کو نکارە پرسگرێکێن خوە یێن ناڤخوەیی چارەسەر بکە».
مهزلووم عهبدی گۆت: «ئەم گەفێن ترکیێ جدی دبینن. ئەم تەخمین دکن کو د مەها شباتێ دە ئێریشەک پێک وەرە. باژارێ کۆبانی ژ بەر واتەیا خوە یا سەمبۆلیک ژ بۆ کوردێن جیهانێ جهەکی موهتەمەلە. ترکیە بەر ب هلبژارتنان ڤە دچە و ئەم دزانن کو سەرۆکكۆمار ئەردۆگان دخوازە پشتگریا نەتەوەپەرەستان بدەست بخە و وسا دخویە کو د وێ باوەریێ دەیە کو جارەکە دن ئێریشکرنا ل سەر رۆژئاڤا دکارە خزمەتێ ژ ڤێ ئارمانجێ رە بکە».
د 20ێ مژدارا 2022ان دە ترکیێ دەست ب ئۆپەراسیۆنا ب ناڤێ «چەنگ-شوور» کر و هەژمارەک پێگەهێن ههسهدێ ل رۆژئاڤایێ کوردستانێ و ناڤچەیێن دن یێن د بن کۆنترۆلا رێڤەبەریا خوەسەر دە بۆمبەباران کرن. ترکیە د وێ باوەریێ دەیە کو ههسهده ژی بەشەک ژ پهكهكێ یه.
