قەتلکرنا 5 ئەندامێن 2 مالباتێن دوھۆکێ یێن ل سەر رێیا نسێبین-مێردینێ کو ژ ھەرێما کوردستانێ ژ دەریێ سینۆرێ ئیبراھیم خەلیل/خابوورێ درباسی باکورێ کوردستانێ بووی ژ بۆ کو بچن ئامەدێ، ژ ئالیێ گەلەک سازی و کەسان ڤە ھات شەرمەزارکرن. ناڤەندا گشتی یا ھەدەپێ کەڕ و بێدەنگ ما.
کۆمکوژیا 5 کوردێن وەلاتیێن ھەرێما کوردستانێ ل مێردینێ، بوو سەدەما کارڤەدانا ل ھەرێما کوردستانێ. کوشتنا کەسێن کو تەمەنێ وان یا ھەری بچووک 35 سالییە و پرانیا وان ژ 60 سالی مەزنترن، گولـلە بەر سەرەێ وان دان و ئەو کوشتن. ئەڤ بوویەرا دلتەزین ھەم ل باکورێ کوردستانێ ھەم ژی ل باشوورێ کوردستانێ بوو سەدەما کارڤەدانێن مەزن. گەلەک کەسایەت و سازیان بوویەر شەرمەزار کرن.
ھەدەپە و دەبەپە بێدەنگ مان
چاڤێ کوردان ل ھەدەپێ بوو. ھەدەپە کو ل سەر ھەر پرسگرێکەکا مەزن و بچووکا ل ترکیەیێ داخویانیەکێ ددە، نەخواست بوویەرا مێردینێ ببینە. ل دەربارێ ڤێ کارەساتا مەزن نە داخویانییەک بەلاڤکر و نە ژی سازیێن خوەیێن ل قادێ ژ بۆ پاراستنا جەنازەیان و ڤەگوھەستنا جەنازەیان ئەرکدار کرن. ئەڤ ھەلوەستا ھەدەپێ ل بەر چاڤێن گەلێ کورد وندا نەبوو. ھەر وھا دەبەپە کو ل گەل ھەدەپێ ل ھەمان ناڤەندێ دمینە بێدەنگ ما و نەخواست ڤێ بوویەرا مەزن ببینە. گەر ل ترکییێ بزنا یەکی ترک ل چۆلێ وەندا ببا دا ھەدەپە داخویانیێ بەلاڤکە و خەمگینییا خوە ئاراستەیی مالباتا خوەدییێ بزنێ کەت. ب راستی ھەلوەستا ڤان ھەر دو پارتیێن کو ل سەر رێبازا پەکەکێ ھاتنە رێکخستن، جھێ داخێیە. ھەلوەستا پەکەکێ یا نەیاری ل ھەمبەری حکوومەتا ھەرێما کوردستانێ و گەلێ باشوور چبە ھەلوەستا ھەدەپێ ژی ئەوە. ھەدەپە ب ئیشارەتا پەکەکێ حەرکەتێ دکە. لێ ئەڤ تاوان ل سەر پارتییەکێ نە بوو، ل ھەمبەر دو مالباتێن کوردیێن بێ گونەھ و ژار ھاتبوو کرن. ھەڤنیشتیمانی چییە؛ ھەڤنیشتیمانی ئەوە کو مرۆڤ شێنی و شاھی، ئێش و ئازارێن خوە پارڤەبکە. ھەدەپێ ب ڤێ ھەلوەستا خوە دییار کر کو ئەو نە نوونەرێ گەلێ کوردە ژ بەر کو قەتلکرنا 5 کوردێن بێگونەھ دلێ ھەموو کوردان شەوتاند لێ ھەدەپە بێدەنگ ما.
تەنێ ھەڤسەرۆکێ ھەدەپێ یێ شاخێ ستەنبۆلێ فەرھاد ئەنجوو ل سەر حەسابا خوە یا تویتەرێ خواست بوویەر بێ ئاشکەراکرن. د داخویانیێ دا گۆت “ژ دو مالباتێن کوردێن دوھۆکێ یێن ل سەر رێیا نسێبین و مێردینێ، 5 کەسێن کو 3 ژ وان ژنن، ژ ئالیێ کەسێن چەکدار ڤە ھاتن قەتلکرن. دڤێت د زووترین دەم دا بەرپرسێن ڤێ کۆمکوژیێ بێن دیتن و ئەو مژا پشت ڤێ بوویەرێ ژ بۆ رایا گشتی بهێت راڤەکرن.”
گەلەک دەردۆرێن ل دەرڤەیی ھەدەپێ بەرتەک نیشانی ڤێ بوویەرێ دان. سەرۆکێ گشتی یێ ھودا-پارێ زەکەریا یاپجۆغلویێ ئۆدەیا بازرگانی و پیشەسازییا ئامەدێ داخویانی دا و بوویەر شەرمەزار کر و خواست تاونبار بێن پەیداکرن. دیسا ل مێردینێ 61 رێخستنێن سڤیل داخویانیەکا ھەڤپار دان چاپەمەنیێ و بوویەر شەرمەزار کرن و خواستن زووترین وەخت کوژەر بێن دیتن.
