فەرماندارەکی پێشمەرگە ئاشکەرا دکە کو د ئەنجاما بۆمبەبارانا بالەفرێن شەر یێن ئیراقێ ل سینۆرێ قەزا خورماتوو دە 11 چەکدارێن داعشێ ھاتن کوشتن.
فەرماندارێ لیوایا 731 یا پێشمەرگە عەمید جەمال وارانی کو بنکەیێ وان ل ناڤچەیا داوودیێ یە، ژ بۆ چاپەمەنیا ئیراقێ راگەھاند، ھێزێن ئیراقێ ل ناڤچەیا تاوێرکە یا ل باکورێ رۆژھلاتێ خورماتوو ئۆپەراسیۆنەک ل دژی داعشێ برێڤە برن و بالەفرێن شەر ئێن ئیراقێ بنکەیێن داعشێ یێن ل ناڤچەیێ بۆمبەباران کرنە و د ئەنجامێ دە 11 چەکدارێن داعشێ ھاتن کوشتن.
رێڤەبەرێ پۆلیسێ خورماتوو عەمید حوسێن عەلی ژی راگەھاند: “رۆژێن شەمبی و یەکشەمبا بۆری ھێزێن ئیراقێ ئۆپەراسیۆن ل دژی داعشێ ل دەردۆرا گوندێن باکورێ رۆژھلاتێ خورماتوو پێکانین و بالەفرێن شەر یێن ئیراقێ بنکەیێن داعشێ بۆمبەباران کرن.”
ھەروھا گۆت: “لێ ئۆپەراسیۆنا ھاتیە کرن ژ ئالیێ ھێزێن لەشکەری ڤە ھاتیە کرن، ژ بەر وێ ژی زێدە ئاگاھیا مە دەربارێ ڤێ چالاکیا لەشکەر دە تنە.”
گوندێن تاوێرکەوە، شۆراو و پەلکانە کول یێن سینۆرێ ناڤچەیا داوودە نە و دکەڤن جیھێن ڤالاتیا ئەولەھیێ و داعشێ کاریە خوە د وان دەڤەران دە ڤەشێرە و دەم ب دەم ل وان گوندان دچن ناڤچەیێن دن و کریارێن تەرۆریستی دکن کو ھەری داویێ ژی 2 شڤانێن کورد نێزیک گوندێ پەلکانە رەڤاندن.
پشتی وان بوویەران ھێزێن ئیراقێ د وان دو رۆژێن بۆری دە ل دژی داعشێ ل ناڤچەیێ دەست ب ئۆپەراسیۆنێ کرن و بالەفرێن شەر ئێن ئیراقێ ژی چەند جارەکی بنکەیێن داعشێ بۆمبەباران کرن و د ئەنجامێ دە 11 چەکدارێن داعشێ ھاتن کوشتن.
