پیلانێن قرێژ و ته‌رۆرێ یێن پارتییا كاركه‌ران ل دژی باشوورێ كوردستانێ و شینیێن وێ ده‌وام دكن، هه‌ری داوی و پاش ئیفشابوونا گرووپه‌كه ته‌رۆریستی یێ سه‌ر ب په‌كه‌كێ ڤه كو د خوه‌ست ته‌قینان ل كامپێن په‌نابه‌ران یێن دهۆكێ ئه‌نجام بده، په‌كه‌كێ وه‌كه تۆلهلدان هه‌ژماره‌كه هه‌مولاتیێن ئێزدی ده‌سته‌سه‌ر كرنه.
داركا مازی ژ چاڤكانیێن خوه یێن ته‌یبه‌ت هین بوو كو چه‌كدارێن په‌كه‌كێ ل رۆژێن رابووری هه‌ژماره‌كه هه‌مولاتیێن ئێزدی ل كۆمه‌لگه‌ها خانه‌سۆری یا گرێدای شه‌نگالێ ده‌سته‌سه‌ر كرنه، وه‌كه تۆلهلدانه‌كێ ل همبه‌ری ده‌سته‌سه‌ر كرنا وێ گرووپا ته‌رۆریستی یا سه‌ر ب رێخستنێ ڤه كو د خوه‌ست كریارێن ته‌رۆریستی و ته‌قینان ل كامپێن په‌نابه‌رێن ئێزدی یێن ل سینۆرێ پارێزگه‌ها دهۆكێ ئه‌نجام بده.
ئه‌نجومه‌نا ئاساییشا هه‌رێما كوردستانێ، ل رۆژا 18/1/2023 داخویانیه‌ك ڤیدیۆیی به‌لاڤ كر و تێ ده دانپێدانێن گرووپه‌كه ته‌رۆریستی یا گرێدای په‌كه‌كێ هاتن ئاشكه‌ره كرن كو ڤێ گرووپێ چاڤدێریا ئۆتۆمبیلێن لەشکەری، کەسایەتیێن ئۆلی، جڤاکی و سیاسی دکرن ب ئارمانجا پێکانینا کریارێن تەرۆریستی و هه‌موه‌خت ئه‌نجامدایینا تەقینان ل کامپێن (شاریا، بێرسڤێ، كه‌به‌رتوو و شێخان) یێن ل پارێزگه‌ها دهۆكێ.
پاش به‌لاڤبوونا ڤێ داخۆیانییا ئه‌نجومه‌نا ئاساییشێ، رێخستنا په‌كه‌كێ پیلانێن تۆلهلدانێ چێكرنه و هه‌ری داوی هه‌ژماره‌كه هه‌مولاتیێن ئێزدی یێن بێ گونه‌هـ ل كۆمه‌لگه‌ها خانه‌سۆرێ ده‌سته‌سه‌ر كرنه.
داركا مازی هین بوو كو ناڤێ هنه‌ك ژ وان ئێزدیێن كو ژ هێلا په‌كه‌كێ ڤه هاتنه ده‌سته‌سه‌ر كرن ووسانه:
«سه‌عه‌د، سه‌لاح و هه‌روه‌ها هه‌مولاتیێ ب ناڤێ لازم عه‌جاج».
هێژای گۆتنێ یه، رێخستنا په‌كه‌كێ ل مه‌ها چریا دویه‌مین یا سالا رابووری 2022 ژی سه‌ناریۆیه‌ك چێكربوو و دانپێدانێن هنه‌ك هه‌مولاتیێن ئێزدی ل ژێر ئیشكه‌نجه‌یێ ل ته‌له‌فزیوونا خوه یا ب ناڤێ چرا به‌لاڤ كرن كو ئێزدییان ئالیكارییا سازیێن ئه‌وله‌هیێ یێن هه‌رێما كوردستانێ و ئیستخباراتا ده‌وله‌تا ترك كرنه.
كامپێن رێخستنا په‌كه‌كێ د خوه‌ست ل ڤێ داویێ ته‌قینان لێ ئه‌نجام بده، هه‌مان كامپن كو په‌نابه‌رێن ئێزدی لێ دمینن و ژ ئێریشا تەرۆریستێن داعشێ و هه‌یا رۆژا مه یا ئیرۆ نكارینه ژ بەر نه‌ئارامیا ئاساییشێ و خوه‌سەپاندنا گرووپێن نەیاسایی و په‌كه‌كێ ل شنگالێ ڤه‌گه‌رن وارێن خوه.
