د رۆژا 3/8/2014ان دە چەکدارێن سەر ب رێخستنا تەرۆریستی یا ب ناڤێ داعشێ ئێریشی شەنگالێ کرن، ب سەدەما ڤێ ئێریشێ هەژمارەک هەری زێدە یا ئێزدیان هاتن کوشتن، رەڤاندن و گەلەک ژی ژ وارێ خوە دورکەتن و نەچار مان د کامپان دە و د رەوشەکا پر خەراب دە بژین، ئێریشا داعشێ ل سەر شەنگالێ ووسا کر کو گەلێ ئێزدی ژ هەڤ ڤەقەتە و دووراتیەک د نێڤبەرا وان دە دروست ببە، لێ بەلێ، یاکو ئیرۆ پەکەکە د دەرحەق ئێزدیان دە دکە گەر ژ وێ یا کو داعشێ ب ئێزدیان کری پێتر نەبە، بێ گومان کێمتر نینە.

ت تشتەکی ئێزدیان تونە کو پەکەکێ دەستوەردان تێدە نەکری، شەنگالا کو ب پایتەختێ ئۆلا ئێزدیان تێ ناسکرن، شەنگالا کو ب سەدان سالان ئێزدی د هەمبێزا خوە دە خوەدی کرنە، شەنگالا کو کۆکا ئێزیدخانێ و گەلێ ئاشتیخوازێ ئێزدیە، ب سایا سەرێ پەکەکێ هێژان وێران مایە، ئەو شەنگالا کو د بەرێ دە گەلێ ئێزدی تێدە کێف خوەش و ئەڤیندارێن ژیانکرنێ، شەنگالا کو ئێزدی تێدە ب ستران و دیلانان دژیان ئیرۆ ب سایا سەرێ پەکەکێ تەڤ نرخ و بهایێن خوە یێن بەرێ ژ دەست دانە، ژ بەر کو پەکەکە جینۆسایدەکە چاندی ل سەر ڤی باژارێ کوردان پێکتینە. پەکەکە ل شەنگالێ هەقارەتێ ل چاند و کلتوور و ئۆلا باڤ و کالێن ئێزدیان دکە.

پەکەکێ ژ ئالیێ جڤاکی ڤە شەنگالا جینۆساید کریە

پەکەکە ئیرۆ ل شەنگالێ بوویە دەردەکی بێی دەرمان، پەکەکە ل شەنگالێ پێش هەر تشتی مەژیکێ جوانێن ئێزدی تەڤلیهەڤ دکە، وان فێری کارێن خەراب وەکە هەقارەتکرن ب پیرۆزیێن ئۆلا ئێزدیان، هەقارەتکرن ب چاند و کۆلتوورا ئێزدیان دکە، پەکەکە جوانێن ئێزدی ژ ئۆل و خواندن و دبستانێ دوور دکە، ناهێلە ئێزدی ب ئازادی بژین و خوە وەکە بەرێ ناس بکن و بەر ب پێش بچن، هەیا کو بکارە وان د بن کۆنترۆلا خوە دە بهێلە. پەکەکێ ژیانا تەڤ ئێزدیان خستیە بن سێبەرا چەک.

پەکەکە ل شەنگالێ د تونەلەکی دە کو ل چیایێ شەنگالێ چێکریە گەلێ ئێزدی ل گۆر حەزا خوە ب ئیدۆلۆژیا خوە یا گەنی پەروەردە دکە، وان ل سەر فکارێن دوور ژ ئۆلا پیرۆزا ئێزدیخانێ پەروەردە دکە، هەقارەتێ ب تاووسێ مەلەک دکە و ژ وان رە دبێژە ئەڤ چیڤانۆکەک پێکەنۆکە، نابە هوون باهوەر بکن، سەدەما ڤێ یەکێ کو ئەڤقاس فەرمان ل سەر وە تێن مەشاندن باهوەرکرنا ڤان چیڤانۆکێن نەراستە، ب ڤێ یەکێ ژی جڤاکا ئێزدی ژ هەڤ ڤەدقەتینە و وان ل گۆر بەرژەوەندا خوە پەروەردە دکە.

پەکەکێ ژ ئالیێ ئەردنیگاری و ئەولەهی ڤە ژی شەنگال جینۆساید کریە

هەر کەس دزانە چیایێ شەنگالێ سەمبۆلا بەرخوەدانا ئێزدیانە ب درێژاهیا دیرۆکێ، ئەڤ چیا هەرتم ژ ئێزدیان رە وەکە جیهەکێ ئەولە بوویە و ئێزدی ژ پێتری ژ 73 فەرمانان پاراستنە، د هوندرێ هەر ئێزدیەکی دە چیایێ شەنگالێ خوەدی تایبەتمەندی و پیرۆزیە، ژ بەر کو ستارگەها پاراستنا ئێزدیانە ژ دەست هەر دوژمنەکی، لێ بەلێ، پەکەکێ ئیرۆ ب دەهان تونەل ل ڤی چیایێ پیرۆز کۆلاندنە، زندانێن بن ئەرد تێ دە چێکرنە و رێ ب ئێزدیان نادە بچن چیایێ شەنگالێ، پەکەکە ب ئاوایەکی بەردەوام عەرەبا ل سووریێ تینە ژ بۆی کو ل چیایێ شەنگالێ تونەلان ژ چەکدارێن وێ رە بکۆلن. پەکەکێ گەلێ ئێزدی ژ ملک و مالێن وان ژ باخ و بۆستانێن وان یێن ل ڤی چیای دوور کرنە رێ ب وان نادە ئەردێن خوە بکار بینن، ب ڤی ئاوا بە وێ د دەمەکی پڕ نێز دە ئێزدی ڤی چیایێ کو سەمبۆلا پاراستنا وانە ژ دەست بدن.

پەکەکە هەر وها لاوازیا بارێ ئابۆری یێ گەلێ ئێزدی ژ خوە رە وەک فەرسەند دبینە و ئەرد و ملکێن وان ب پەرەیەکی هەری کێم دکرە، ئەڤ ژی وێ گۆمانێ دروست دکە کو پەکەکە ژ بۆی کو عەرەبا یان ژی هن ژ کەس و مالباتێن سەر ب خوە ڤە ل ور نیشتەجی بکە دکرە، یانژی دبە کو ب ڤێ یەکێ ژ گەلێ ئێزدی رە ببێژە ئەمن خوەدیێن ڤی ئەردی.

هەر کو دچە رەوشا ئەولەهی یا شەنگالێ پێتر خەراب دبە، پەکەکە ژی ل شوونا چارەسەرکرنا ڤێ رەوشێ ب ئاوایەکی بەرەلا ب کارێ چەکدارکرنا ب زۆر یا جوانێن ئێزدی یێن د بن 18 سالیێ دە رادبە، ب پەرەیێ کو ژ هەڤالبەندێن خوە وەردگرە مووچەیەکی هەری کێم ب ڤان جوانان ددە و وان دخاپینە و دخە بن کۆنترۆلا خوە دە، پەکەکە ڤان جوانان ل دژی حکوومەتا هەرێما کوردستانێ و ل دژی حکوومەتا ئیراقێ و هەر کەسەکی کو ل دژی بەرژەوەندیێن پەکەکێ تەڤ بگەرە بکارتینە.

پەکەکە ب ئاوایەکی پر بێئەخلاق ڤان جوانان پەروەردە دکە، ب ئاوایەکی ب مەژیکێ وان دلیزە کو وان رازی دکە هەتا برایێن خوە ژی بکوژن، ژ بۆی ڤێ یەکێ ژی پەکەکە بەردەوام ڤان جوانان د بن پەروەردەیا فکری و لەشکری یا خوە دە دهێلە.

هەر وەها پەکەکە ڤان جوانان ل سەر چەوانیا چێکرنا بۆمبەیان و ڤەگوهاستنا وان پەروەردە دکە، باشترین میناک ژی ل خوە موکرهاتنا ئەندامێن وێ گرۆپا تەرۆریستی بوو یا کو سازییا دژە تەرۆرا کوردستانێ دو رۆژ بەرێ ئیفادەیێن وان پارڤەکری.

ڤان جوانێن ئێزدی یێن کو مەژیکێ وان ب ئایدۆلۆژیا گەنی یا پەکەکێ و رێبەرێ وێ هاتیە شۆشتن و ئەندامێن یەبەشێ نە، د ئیفادەیێن خوە دە ئەشکەرە کر کو پەکەکێ ژ هەر یەک ژ وان رە بۆمبەیەک دا هەیا کو د ناڤا کامپێن برایێن خوە یێن ئێزدی دە بتەقینن.

ل ڤر ئەڤ پرسە سەرهلددە، گەلۆ ئێزدیان هەیا نها ت فێدە ژ پەکەکێ کریە، ژ خەینی زرارا مادی و جانی؟ چما پەکەکە ل شەنگالێ ئەڤقاس پلانێن تەرۆریستی ل دژی مرۆڤاهیێ ئۆرگانیزە دکە؟ چما جوانێن ئێزدی تەشڤیق دکە د ناڤا کامپێن برایێن خوە دە تەقینان پێک بینن؟ گەلۆ ب راستی ژی پەکەکە دخوازە گەلێ ئێزدی چەوا ل همبەر رایا گشتی یا ناڤخوەیی و جیهانی بەرچاڤ بکە؟