رێخستنا لێبۆرینا ناڤدەولەتی (ئەمنستی ئینترنەشنال) دبێژە، دڤێت ھێزێن رێژیما سووریێ دۆرپێچا کو ل سەر سڤیلێن ل تاخێن شێخ مەقسوود و ئەشرەفیێ یێن حەلەبێ کو پرانیا وان کوردن سەپاندنە، راکە.
ئەمنستی دوھی د راپۆرتەکێ دا راگھاند، ھێزێن رێژیما سووریێ دۆرپێچەکا توند ل سەر ھەر دو تاخان و گوندێن ھەرێما شەھبایێ سەپاندنە و تەکەز کرن کو ئەو گھیشتنا سۆتەمەنی و پێدڤیێن دنێن ژیانێ یێن سەرەکی بۆ وان دەڤران ئاستەنگ دکە.
ھێزێن رەژیمێ ژ تەباخا 2022یێ ڤە ب دەھ ھەزاران سڤیل، د ناڤ وان دا کۆچبەرێن ناڤخوەیی ب تایبەتێن عەفرینێ ھەنە، ل تاخێن کوردان یێن حەلەبێ (شێخ مەقسوود و ئەشرەفیێ) و نێزیکی 50 گوندێن ھەرێما شەھبایێ یێن د بن کۆنترۆلا رێڤەبەریا خوەسەر دا، خستنە بن دۆرپێچەکا توند و رێ نادە سۆتەمەنی، دەرمان و پێدڤیێن دن یێن ژیانێ بگھن وان.
ل گۆری راپۆرا ئەمنستی، پێدڤیێن پزیشکی نھا ل وان دەڤەران قەدیانە و خەلک د ڤێ وەرزێ زڤستانێ ژ بۆ خوەگەرمکرنێ، ئالاڤێن مالێ و پلاستیکان دشەوتینن.
کەسێن کو ئەمنستی ب وان ھەڤپەیڤین کرنە گۆتن کو ژ داویا مەھا تەباخا سالا بۆری ڤە، ھێزێن رێژیمێ و ب تایبەت “فرقەیا چاران” یا سەر ب ماھر ئەسەد ڤە، دەرباسبوونا سۆتەمەنیێ بۆ ناڤچەیێن دۆرپێچکری، گەلەکی سینۆردار کرنە. د ئەنجامێ دا ژی، ئەڤ تاخ رۆژانە تەنێ دو دەمژمێران ئەلەکتریکێ وەردگرن.
پزیشکەکی کو ل نەخوەشخانەیەکا ھەرێما شاھبا کار دکە گۆتیە رێخستنا ئەمنستی: “ئەم گەلەکی ب ترسن کو سۆتەمەنیا مووەلیدەیا نەخوەشخانەیێ ب داوی ببە. پرسگرێک ئەوە کو ئەم نکارن کارەبا ھندەک بەشێن نەخوەشخانەیێ وەک بەشا لێنێرینا گران، ئۆدەیا نەشتەرگەریێ یان ژی ناڤەندا لێنێرینا ھوور قوت بکن، ژ بەر ڤێ یەکێ پێویستیا مە ب کارەبا 24 دەمژمێران ھەیە.”
تاخێن شێخ مەقسوود و ئەشرەفیێ یێن حەلەبێ وەک تاخێن کوردان تێ ناسین و نێزیکی 200 ھەزار کەس لێ دژین. ھەرێما شەھبایێ ژی د ناڤبەرا ھەرێما عەفرین و حەلەبێ دەیە و د دەستێ یەکینەیێن پاراستنا گەل (یەپەگێ) دەیە. ژ دەما داگیرکرنا عەفرینێ ژ ئالیێ ئارتێشا ترکیێ و گرووپێن چەکدارێن سەر ب وێ ڤە د ئادارا 2018ێ دا، دۆرا 150 ھەزار عەفرینی ل 5 کامپان و ل گوندێن وێ ھەرێمێ بجھ بوونە.
