بالافرێن شەر یێن دەولەتا ترکیێ یەک ژ بەرپرسێن پایەبلندێن پەیەدێ ل رۆژئاڤایێ کوردستانێ ئارمانج کر و د ئەنجام دە ب سەختی بریندار کر، ب ڤێ سەدەمێ ژی پەیەدێ ب تاوانا سیخۆریا ژ بۆی ترکیێ ل سەر ڤێ مژارێ یەک ژ بەرپرسێن خوە یێن دن دەستەسەر کر.
ل گۆر زانیاریێن تایبەت یێن پێگەها «دارکا مازی» کو ژ چاڤکانیێن خوە یێن ل رۆژئاڤا کوردستانێ ب دەست خستنە، بالافرێن شەر یێن دەولەتا ترکیێ ل رۆژا 19/1/2023ێ د دەمژمێر نێزی 4ێ ئێڤارێ دە ئۆفیسا پێوەندیێن ئیستیخباراتا پەیەدێ ب هێزێن هەڤپەیمانییا ناڤدەولەتی ل باژارۆکێ رمێلانێ کو دکەڤە نێزی کۆمپانیا «رۆتکو» بۆمبەباران کریە و د ئەنجام دە بەرپرسێ ڤێ ئۆفیسێ یێ ب ناڤێ «برۆسک» کو ژ باکورێ کوردستانێ یە ب گرانی بریندار بوویە.
پشتی «برۆسک» ب گرانی بریندار بووی، نها ب مەرەما چارەسەریێن پزشکی ل نەخوەشخانەیا دێرکێ یە و ل سەر ڤێ مژارێ ب تاوانا سیخۆریا ژ بۆی دەولەتا ترکیێ یەک ژ ئەندامێن ئیستیخباراتا پەیەدێ ژ ئالیێ هێزێن ئەولەهیێ ڤە هاتیە دەستەسەرکرن.
چاڤکانیێن مە ئەشکەرە کرن، پشتی ڤێ ئێریشێ راستەراست ئیستیخباراتا پەیەدێ دەست ب لەکۆلینێ کر و رۆژا 21/1/2023ێ ئەندامەکی ئیستیخباراتا خوە کو ل ئۆفیسا پێوەندیێن ئیستیخباراتا پەیەدێ ب هێزێن هەڤپەیمانیا ناڤدەولەتی کار دکە، ب ناڤێ «زانا سالح عەلی» کو ژ قامشلۆیێ یە ب تاوانا پێدانا زانیاریان ب دەولەتا ترکیێ دەستەسەرکر.
د دەما داوی دە، لگەل زێدەبوونا گەفێن ترکیێ یێن ژ بۆ دەستپێکرنا ئۆپەراسیۆنەکە لەشکەری ل رۆژئاڤایێ کوردستانێ و باکورێ سووریێ، ئێریشێن ئاسمانی یێن ب رێیا درۆنان ل سەر رۆژئاڤایێ کوردستانێ و ھەرێمن د بن کۆنترۆلا پەیەدێ دا زێدە بوونە.
