مه‌سه‌ده‌: نێزیکبوونا شام و ئەنقەرێ ژ بۆ تێکبرنا رێڤەبەریا خوەسەرە

msd-syria-turkey-reveberiya-xewser

ئەنجوومەنا سووریەیا دەمۆکرات مه‌سه‌دێ راگهاندیە کو نێزیکبوونا شام و ئەنقەرێ ژ بۆ تێکدانا پرۆژەیا رێڤەبەریا خوەسەر و کوورکرنا کریزا سووریێ یە.

ب درووشما «ژ هەڤ نێزیکبوونا شام و ئەنقەرێ و رەنگڤەدانا وێ ل سەر دۆزا سووریێ و پەنابەران»، نڤیسگەها پەیوەندیان یا ئەنجوومەنا سووریەیا دەمۆکرات مه‌سه‌دێ، رۆژا چارشەمبێ 25ێ چلە پانەلەک لدار خست.

مه‌سه‌دێ د وێ پانەلێ دە راگهاند کو نێزیکبوونا شام و ئەنقەرێ ژ بۆ تێکدانا پرۆژەیا رێڤەبەریا خوەسەرە.

هەروها تەکەزی ل سەر وێ یەکێ ژی کر کو ترکیە یەک ژ دەولەتێن خوەدی باندۆرە د کریزا سووریێ دە و ژ دەستپێکا وێ کریزێ ڤە، ترکیێ پشتگری و ئالیکاریا گرووپێن چەکدار کریە.

ئەندامێ ئۆفیسا تێکلیێن گشتی یا مه‌سه‌دێ عەلی رەحموون د پانەلێ دە راگهاند، «ئەم هەموو دزانن کو ترکیە یەک ژ وان دەولەتانە کو د کریزا سووریێ دە خوەدی رۆلە. ژ دەستپێکا ئالۆزیا سووریێ ڤە دەستەکێ ددە چەتەیێن چەکدار، لێ پشترە ئەو کۆم کەتن بن سیوانا رێخستنێن جیهادی».

رەحموون دا زانین کو ترکیە دخوازە ئارمانجێن خوە پێک بینە و گۆت، «داگیرکەریا ترکیێ یا ل عەفرین، گرێ سپی و سەرێ کانیێ باندۆرەکە نەیینی کر. ئەم هەموو دزانن کو دەما داعش ل سەر سینۆرێ ترکیێ بوو ت پرسگرێک دەرنەکەت. لێ دەما کو پێکهاتەیەکە دەمۆکراتیک ل هەرێمێ دەرکەت هۆلێ، ل پێشبەری وێ راوەستیا و خوەست ب پارچەکرن و داگیرکرنا خاکا سووریێ بگهێژە ئارمانجێن خوە».

د هەمان پانەلێ دە مه‌سه‌دێ راگهاند کو، رێڤەبەریا خوەسەر رەژیما ستەمکار ناپەژرینە و دێ کار ژ بۆ سووریەیا نەناڤەندی بکە.

مەجلسا سووریەیا دەمۆکراتیک هەروها دەستنیشان کر کو ئەو نێزیکبوونا د ناڤبەرا شام و ئەنقەرێ دە رەد دکە، ژ بەر کونە ل گۆر بەرژەوەندیا گەلێن سووریێ یە.

ئەندامێ پارتیا یه‌كیتیا کورد ئۆسمان عەلی دیار کر کو لهەڤکرنا شام-ئەنقەرێ دەمکی یە و ئارمانجا ڤێ نێزیکبوونێ «ڤەگەراندنا پەنابەرانە».

دۆکتۆر حەسەن شەواخ ژی دیار کر کو گەلێ سووریێ ل دژی نێزیکبوونا شام-ئەنقەرێ یە و دەستنیشان کر، چارەسەریا ئالۆزیا سووریێ دێ «ب پێکانینا میناکا رێڤەبەریا خوەسەر ل تەڤاهیا سووریێ» بە.

پوستێن ھەمان بەش