نێچیرڤان بارزانی و ئەردۆگان ل ئەنقەرێ جڤیان

نێچیرڤان بارزانی و ئەردۆگان ل ئەنقەرێ جڤیان

سەرۆکێ ھەرێما کوردستانێ نێچیرڤان بارزانی سەردانا ئەنقەرێ کر و لگەل سەرۆککۆمارێ ترکیێ رەجەب تەییب ئەردۆگان جڤیا و چەند مژارێن جھێ گرینگیدانا ھەڤبەشا ھەردو ئالیان گۆتووبێژ کرن.

ئیرۆ پێنجشەمبێ 26ێ چلەیا 2023یێ، سەرۆکاتیا ھەرێما کوردستانێ د داخویانیەکێ دا راگھاند، سەرۆکێ ھەرێما کوردستانێ نێچیرڤان بارزانی ب سەردانەکێ گھیشتە ئەنقەرێ و لگەل سەرۆککۆمارێ ترکیێ رەجەب تەییب ئەردۆگان جڤیا.

د داخویانیێ دا ھات راگھاندن: “د جڤینێ دا پێوەندیێن ئیراق و ھەرێما کوردستانێ لگەل ترکیێ، رەوشا سیاسییا ئیراق و ھەرێما کوردستانێ، ب تایبەتی پشتی دەستبکارکرنا کابینەیا نوویا حکوومەتا فەدەرالا ئیراقێ، پێوەندیێن ھەولێر – بەغدایێ و گۆتووبێژا چارەسەرکرنا کێشەیێن ناڤبەرا وان و دەرفەتێن ئالیکاریا ئیراق و ھەرێما کوردستانێ لگەل ترکیێ د وارێ ئەنەرژیێ دا، ھاتن گۆتووبێژکرن.”

سەرۆکاتیا ھەرێما کوردستانێ ئەشکەرە کر: “ھەردو ئالیان تەکەزی ل سەر داخوازا دوئالی یا پێشڤەبرنا پێوەندیێن ھەرێما کوردستانێ و ترکیێ د ھەموو واران دا کرن، ب تایبەتی ژی د وارێ بازرگانی و ئابۆری و سوودوەرگرتنا ژ وان دەرفەتێن کو ژ بۆ بەرفرەھکرنا ئالیکاریا ھەڤبەشا ئیراق و ھەرێما کوردستانێ لگەل ترکیێ د وارێ ئەنەرژیێ دا ھاتیە ھۆلێ کو دبە رۆلا وێ یا ئاکتیڤ ھەبە د تژیکرنا وێ ڤالاھی و پێویستیا ئیرۆ یا ل جیھانێ، ب تایبەتی ل ئەورۆپایێ د وارێ ئەنەرژی و گازا سرووشتی دا دروست بوویە.”

ھەروھا ھات دیارکرن: “گرینگیا بھێزکرنا ئالیکاری و ھەڤاھەنگیا ئیراق و ھەرێما کوردستانێ لگەل ترکیێ ژ بۆ پاراستنا ئاساییشا سینۆر، پێشھاتەیێن ھەری داوی یێن شەرێ دژی تەرۆرێ و مەترسیێن داعشێ ل ئیراق و سووریێ، رەوشا ناڤچەیێ ب گشتی و چەند مژارێن دنێن جھێ گرینگیدانا ھەڤبەش، بەشەکە دن یا جڤینێ بوو.”

پوستێن ھەمان بەش