ل گۆر رێخستنێن مافێ مرۆڤان و ئالیێن سیاسی ل رۆژئاڤایێ کوردستانێ، لەشکەرکرنا زارۆکان ل رۆژئاڤایێ کوردستانێ ژ ئالیێ رێخستنا جوانێن شۆرەشگێر یا سەر ب پەیەدێ و رێڤەبەریا خوەسەر ڤە بەردەوامە.
د ڤێ دەربارێ دە ئەندامێ نوونەراتیا ئەنەکەسێ ل ھەرێما کوردستانێ، رە در. کاوا ئەزیزی ژ رووداوێ گۆت، “رێڤەبەریا خوەسەر رێکەفتنەک لگەل رێخستنێن ناڤدەولەتی بۆ پاراستنا مافێن زارۆکان ئیمزە کریە، لێ رەڤاندنا زارۆک ھەر بەردوامە. ئەڤ ژی جھێ نیگەرانیا ئەنەکەسێ یە، جھێ نیگەرانیا ملەتێ مەیە. ئێدی کەس نەوێرە کەچکێن خوە بشینن دبستانان، ب ترس دچن و ب ترس ڤەدگەرن و تم ژی ترسەک ل سەر خەلکێ ھەیە.”
لێ ژ ئالیەکی دن ڤە، نەرینەکە جودا د پرسا لەشکەرکرنا زارۆکان دە ل رۆژئاڤایێ کوردستانێ ھەیە. نوونەرێ پارتیا یەکیتی کوردی ئەل-وەحدە ل ھەرێما کوردستانێ ژی راستیا ڤێ پرسێ زەلال کر:
نوونەرێ پارتیا یەکیتی کوردی ئەل-وەحدە ل ھەرێما کوردستانێ مەحموود محەمەد دیار کر “ب رایا من ئەوێن کو ڤی کاری دکن، خالا یەکێ ل دژی رێڤەبەریێ دکن. ئەڤێن کو ڤان کاران دکن ناخوازن رەنگەکی جوان ژ کوردان رە چ ب رێڤەبەریێ بە، چ ب لەشکەریێ بە ل سەر ئاستا جیھانێ وەرە ناسکرن. ب تایبەتی وەکە کو تێ بناڤکرن و ل جادەیان ژی تێ گۆتن ئەڤێن ب ناڤێ جوانێن شۆرەشگەر ڤان کاران دکن. ب رایا من دەرەجەیا یەکەم ل دژی رێڤەبەریێیە.”
ژ ئالیێ خوە ڤە، بەردەڤکێ ھەسەدێ فەرھاد شامی ئەشکەرە کر، ت پەیوەندیا ھەسەدێ ب لەشکەرکرنا زارۆکان نینە، ھەروھا دا زانین کو رێخستنا جوانێن شۆرەشگێر نە سەر ب ھەسەدێ ڤەیە، ناڤبۆری دا زانین کو ئەو تەنێ کەسێن 18 سال تەمام کرنە ل ناڤ رێزێن ھەسەدێ قەبوول دکن.
