ئەنجوومەنا نشتیمانیا کورد ل سووریێ (ئەنه‌که‌سێ) و پارتیا دەمۆکراتا کوردستان-سووریە (په‌ده‌كه‌سێ) راگهاندن کو ئەندامەکی په‌ده‌كه‌سێ بەری چەند رۆژان ژ ئالیێ «چەکدارێن سەر ب په‌یه‌دێ ڤە» هاتیە گرتن.
ئەمینداریا گشتی یا ئەنه‌که‌سێ راگهاندیە، رۆژا شەمیێ 28ێ ڤێ مەهێ، «چەکدارێن په‌یه‌دێ» چالاکڤان عەلی نەجم خەنجەر و ئەندامێ په‌ده‌كه‌سێ-سێ گرتنە.
ل گۆری داخویانیا ئه‌نه‌كه‌سێ، ئەو ئەندامێ په‌ده‌كه‌سێ ل گوندێ بانێ شکەفتێ ل هەرێما دێرکێ هاتیە گرتن و هەتا نها چارەنڤیسا وی نە دیارە.
ئه‌نه‌كه‌سه دبێژە کو ئەو ڤان کریارێن ل دژی نرخێن مرۆڤی و مافێن مرۆڤ شەرمەزار دکە و بانگ ل هەموو ئالیێن پێوەندیدار، هێز و رێخستنان دکە کو ڤان کریاران شەرمەزار بکن. ئه‌نه‌كه‌سێ هەروها بانگ ل وان ئالیان دکە کو داخوازێ ژ په‌یه‌دێ بکن کو دەڤ ژ ڤان کریاران بەردە و گرتیان ئازاد بکە.
پارتیا دەمۆکراتا کوردستان-سووریە (په‌ده‌كه‌س) ژی دەربارێ گرتنا وی ئەندامێ خوە دە داخویانیەک وەشاندیە و راگهاندیە، «رۆژا شەمیێ 28. 01. 2023، دەردۆرا دەمژمێر 4ێ پشتی ئێڤارێ، ئیستخباراتێن په‌یه‌دێ، عەلی نەجم خەنجەر ئەندامێ ئەنجوومەنا شاخ یا پارتیا دەمۆکراتا کوردستان – سووریا په‌ده‌كه‌سێ ل سەر رێیا هەردو گوندێن بانێ شکەفتێ و گرکێ هێول یێن ب سەر دێرکا رۆژئاڤایێ کوردستانێ ڤە رەڤاندن».
د وێ داخویانیێ دە کو دوهـ دوشەمێ 30ێ چلەیا 2023ان هاتیە وەشاندن، ئاماژە ب گرتنا چەند ئەندامێن دن یێن په‌ده‌كه‌سێ هاتیە کرن و هاتیە گۆتن، چەکدارێن په‌یه‌دێ بەریا 34 رۆژان حسێن سلێمان ئەندامێ کۆمیتەیا ناڤەندی یا پارتیا دەمۆکراتا کوردستان-سووریا، و بەریا 35 رۆژان بلند مەلا ئسماعیل ئەندامێ ئەنجوومەنا هەرێمی یا په‌ده‌كه‌سێ، و عەدنان ئسماعیل رەمۆ ئەندامێ ئەنجوومەنا شاخی یا په‌ده‌كه‌سێ بەریا 48 رۆژان دەستەسەر کرنە و هەتا ئیرۆ چارەنڤیسا وان نەدیارە.
