رەوشا خرابا ئەولەھیا ناڤچەیێ، رێگرە ژ بۆ ڤەگەرا کۆچبەرێن شنگالێ

رێڤەبەرێ گشتی یێ ناڤەندا ھەڤبەشیا ھەماھەنگیا کریزان ل وەزارەتا ناڤخوەیا ھەرێما کوردستانێ راگەھاند، رێکەفتنا شنگالێ نەھاتیە جێبەجێ کرن و ئەو یەک ژی رێگرە ل ڤەگەرا کۆچبەرێن شنگالێ.

رێڤەبەرێ گشتییێ ھەڤبەشییا ھەماھەنگیا کریزان ل وەزارەتا ناڤخوەیا حکوومەتا ھەرێما کوردستانێ حوسێن کەلاری راگەھاند: “320 ھەزار کۆچبەر کو ناسنامەیا وان شنگالە، ل ھەرێما کوردستانێ نە و نکارن ڤەگەرن ناڤچەیێن خوە. حکوومەتا ھەرێما کوردستانێ ژی پشتەڤانیا وان دکە کو ئەوێ بخوازە ب دلێ خوە دکارە ڤەگەرە. تیمێن مە ل ھەموو باژاران ژ بۆ تۆمارکرنا وی خەلکێ کۆچبەر ھەیە، کو بخوازن دکارن ڤەگەرن، لێ ب زۆرێ کەس نایێ ڤەگەراندن.”

ھەر وھا گۆت: “د ھەیاما بۆری دا 700 مالباتان ناڤێن خوە نڤیساندن ژ بۆ ڤەگەرن شنگالێ، لێ دەما ب چاڤێ خوە خزمەتگوزاری و رەوشا ئەولەھیا شنگالێ دیتن ژ وێ ھەژمارێ تەنێ 39 مالبات رازیبوون ڤەگەرن شنگالێ. یێن دن ھەموو پۆشمان بوون، سەدەمێ وێ ژی رەوشا ئەولەھی و خرابوونا بنگەھێ ئابۆری و نەبوونا خزمەتگوزاریانە.”

حوسێن کەلاری دیار کر، ھەتا رێکەفتنا شنگالێ یا د ناڤبەرا ھەولێر و بەغدایێ ب وێ میکانیزما ھاتیە دانین ڤە نەیێ جێبەجێ کرن، ھەروھا جان و مالێ ھەموەلاتیان پاراستی نەبە و پشتراستی نەیێ دایین، خەلک ناڤەگەرە. ژ ئالیێ دن ڤە ژی دڤێت گرۆپێن چەکدار و میلیشیایێن ژ یاسایێ دەرکەتی ل شنگالێ بێن دەرخستن.

کەلاری دەربارێ ڤەگەرا خەلکێ پارێزگەھێن باشوور و ناڤەراستا ئیراقێ، کو ژ بەر رەوشا خرابا ئەولەھیێ کۆچبەری ھەرێما کوردستانێ بوونە دا ژی راگەھاند: “پر کێم کۆچبەرێن ئەنبار، سەلاحەدین، نەینەوا و دیالە ڤەدگەرن ناڤچەیێن خوە، ژ بەر رەوشا ئەولەھیا جیھێن خوە پشتراست نینن و پاراستی نینن.”