ناڤەندا راگهاندن و چاپەمەنیێ یا هەپەگێ ناسنامەیا 5 گەریلایێن ژنێن کو د 22-23یێ چلەیێ دە ل بەستایێ ژیانا خوە ژ دەست دابوون ئەشکەرە کر.
د ئۆپەراسیۆنا ئارتێشا ترکیێ یا ب ناڤێ “ئەرەن دۆرپێچ-پاییز-زڤستان-23” کو ل 21ێ چلەیا 2023یێ ل ھەرێما بەستا یا سەر ب پارێزگەھا شرنەخێ ئەنجامدایی دا چەندین گەریلایێن پەکەکێ هاتبوون کوشتن.
د ڤێ ئۆپەراسیۆنێ دا کو دو رۆژان بەردەوام کر، ل هەرێما «مەرگوماریێ» فەرماندارێ تیمەکا لەشکرێ ترکیێ ب ناڤێ «نیعمەت ئەنجوو» ژ ئالیێ گەریلایێن پەکەکێ ڤە هاتبوو کوشتن، هەر وەها 5 گەریلا ژی ژ ئالیێ لەشکرێ ترکیێ ڤە هاتبوون کوشتن.
ئیرۆ رۆژا یەکشەمبی 5/2/2023ێ ئانکو 13 رۆژان پشتی ئۆپەراسیۆنا لەشکرێ ترکیێ، ناڤەندا راگھاندن و چاپەمەنیێ یا ھەپەگێ ب داخویەنیەکا نڤیسکی ناسنامەیا 5 گەریلایێن د ڤێ ئۆپەراسیۆنێ دا هاتیە کوشتن ئەشکەرە کر.
ل گۆر راگھاندنا ھەپەگێ ناسنامەیێن گەریلایێن جانێ خوە ژ دەست دانە وھا نە:
ئەڤین ئەنجوو ب ناسناڤا دەلیلا گۆیی ژ شرنەخێ
رایفە کوتلاک ب ناسناڤا رۆژبین دێرسم ژ جۆلەمێرگێ
حەمدییا تەکبووداک ب ناسناڤا سلا فەراشین ژ وانێ
زۆزان ئۆجال ب ناسناڤا نوودا ئارین ژ وانێ
لەیلا سان ب ناسناڤا دیرۆک سەرحەد ژ سێرتێ
ئەڤین ئەنجوویا گەریلایا پەکەکێ برازایا نیمعەت ئەنجوو یەک ژ لەشکرێن ترکیێ بوو کو د ھەمان پەڤچوونێ دا جانێ خوە ژ دەست دابوو.
هێژایی گۆتنێ یە کو وەزارەتا ناڤخوەیا ترکیێ پێش نها د داخویانیەکێ دا راگھاندبوو کو د شەرێ 22یێ چلەیا 2023ێ دا ل ھەرێما بەستایێ یا شرنەخێ 5 گەریلایێن پەکەکێ هاتنە کوشتن.
