ئەندامێ کۆمیتەیا رێڤەبەرا پەکەکێ موراد کارایلان ژ بۆ تەلەڤزیۆنەکا نێزیکی پەکەکێ ئاخفی و ھندەک نهێنیێن ھەڤدیتنا یەپەگێ-پەیەدێ و ترکیێ ئەشکەرە کرن.
موراد کارایلان دبێژە: “ھەڤسەرۆکێ پەیەدێ سالح مووسلم چەند جاران چوویە ترکیەیێ. وێ دەمێ ناڤبەرا مە و دەولەتا ترکیەیێ دا ژی ئاگربەست ھەبوو. پێڤاژۆیەک ژێ را دھاتە گۆتن “چارەسەری” لێ نە چارەسەری بوو. د وێ دەمێ دا داخوازا دەولەتا ترک ئەڤ بوو، کو کورد ژی ل شامێ بخن. بابەت ب ئەشکەرایی گۆت، دەست بدن سەر قامشلۆیێ، ئەو دەری، دەریێ کو ژ بۆ ترکیەیێ ڤەکری، دەریێ گومروکێ ب دەستێ خوە ڤە بخن ئەم دێ ھەموو تشتی بدن وە. پشتی هنگێ ل تاخێ شێخمەقسوودێ حەلەبێ، بەرێ خوە بدن رەژیمێ ژ بۆ کو حەلەب تێک بچت. وانا دخواست حەلەبێ تێک ببن، ب دەست خوە بخن و بچن شامێ.”
کارایلان دا زانین کوردان ئەو داخوازێن ترکیێ قەبوول نەکرن و گۆت: “مرۆڤ دکارە ببێژە ئەردۆگان سیاسەتا ل سەر کوردان، ل سەر رۆژئاڤا گوھەرت، یەک سەدەم ژی ئەڤ بوو. راستە بەلکی نە ھەموو سەدەم بت، لێ بەلێ سەدەمەک ژی ئەڤە بوو. سیاسەتا کوردان د خەتەکێ دا ئیسرار کر، ل دژی سووریەیێ نەسەکنی. ئەگەر بسەکنیا دا سووریا تێک چت. نھا سووریا پالا خوە ددە رووسیایێ، ددە ئیرانێ. لێ بەلێ دەستپێکێ، مەسەلا ھین د 2012-2013ێ دا ئەگەر کو کورد ژی وەکە کو ترکیا دبێژە بەشداری وان ببوویا، دا تێک چیت.”
کارایلان وھا گۆت: “دڤێت بەشار ئەسەد شاشتیان نەکە و ل دیرۆکێ ڤەگەرە و ببینە کو چاوا حافز ئەسەد ل ھەموو ئەنیان ل بەر خوە دا، ئەڤ یەک ب پشتەڤانیا کوردان بوو، چ ب فەرمی و چ ژی نە ب فەرمی.”
ب گۆتنا کارایلان “سیاسەتا ئەردۆگان سووریا گھاند رەوشا نھا، کو چەتە ل دۆرا خوە کۆم کرن و سووریا وێران کر. دڤێت ئەسەد باوەریا خوە ب ئەردۆگان نەئینە، ژ بەر کو ژ بۆ سەرکەفتنا د ھلبژارتنان دا ئەردۆگان دخوازە بەشار ئەسەد ب کار بینە.”
