ل پارێزگەها گرگومێ ئانگۆ مەره‌شێ یا باکورێ کوردستانێ ب هێزا 7.4 پلە ئەردهەژەک چێبوو و ل سەرانسەرێ باژارێن باکورێ کوردستانێ و هەتا هەولێر و گەلەک باژارێن ترکیێ ژی هات هەستکرن. ل گۆر ئاگاهیێن دەستپێکێ ژ بەر ئەردهەژێ ل گرگومێ و باژارێن دەردۆرێ هەژمارەک ئاڤاهی هلوەشیانە و هه‌ژماره‌كه زێده یا قوربانییان د بن كاڤلان ده مانه.
ناڤەندا تۆمارکرنا ئەردەهەژان یا کاندیلی یا ترکیێ راگهاند کو ئیرۆ رۆژا دوشەمێ 6ێ سباتا 2023ان ل باژارێ گرگومێ یێ باکورێ کوردستانێ د دەمژمێر 04.17ێ ئەردهەژەک ب هێزا 7.4 پلەیێن ریختەرێ چێبوویە.
ل گۆری ئاگاهیێن ل سەر مالپەرا رێڤەبەریا رەوشێن بلەز و کارەساتان (ئافاد) ل ناڤچەیا بازارجخا مەرەشێ د دەمژمێر 04:17ان دە ئەردهەژ پێک هات.
ئەردهەژ 7 کیلۆمەترە د بن ئەردێ دە پێک هاتیە و ل گەلەک باژاران هات هیسکرن، زێدەتری 30 سانیەیان دەوام کر.
ل دیلۆکێ ب هێزا 6،4 و 6،5ان ئەردهەژ چێبوون.
ل ئالیێ دن ئافادێ راگهاند کو د دەمژمێر 04.26ان دە ئەردهەژەکە ب هێزا 6،4 پێک هات کو ناڤەندا ئەردهەژێ ناڤچەیا نورداگ یا دیلۆکێ بوویە.
ل گۆری ئاگاهیێن ل سەر مالپەرا ئافادێ، ئەردهەژ د دەمژمێر 04.36ان دە ل ناڤچەیا ئیسلاهیە یا دیلۆکێ پێک هات.
ئەردهەژا ب مەزناهیا 6،5 ریختەر 9،77 کیلۆمەترە د بن ئەردێ دە پێک هات.
ژ بلی مەرەشێ ژ بەر ئەردهەژێ ل دیلۆک، مەلەتی، ئێلهـ، چەولگ، خارپێت، کلیس، ئامەد، مێردین، سێرت، شرنەخ، وان، مووش، بەدلیس، جۆلەمێرگ، ئەدەنە، ئۆسمانیە و هاتایێ هات هیسکرن، وەلاتی ژ بەر ئەردهەژێ ژ مالێن خوە دەرکەتن.
