تیمێن دەزگەهێ خێرخوازی یێ بارزانی گھیشتن باکورێ کوردستانێ

پشتی بوویەرا ئەردھەژێ یا ل باکورێ کوردستانێ و ترکیێ، دەزگەھێ خێرخوازی یێ بارزانی تیمەکە بەرفرەھ بۆ ئالیکاریا زیان ڤێکەتیێن ئەردھەژێ ب ھەموو پێویستیێن پزیشکی ئامادە کرن و یەکەم کاروان ژی گھیشتە باکورێ کوردستانێ و ترکیێ.

ئیرۆ دوشەمبێ 6ێ شوباتا 2023یێ، رەوا حاجی یێ ژ دەزگەھێ خێرخوازی یێ بارزانی راگھاند، یەکەم کاروانێ وان کو ژ 15 ترۆمبێل و 50 کارمەندێن شارەزایێن وارێن ھاوارچوونا دەستپێکێ و خزمەستێن پزیشکی، ژ دەریێ سینۆری یێ ناڤدەولەتی یێ ئیبراھیم خەلیل ڤە گھیشتە باکورێ کوردستانێ و ترکیێ.

رەوا حاجی ئەشکەرە کر، پشتی راسپارتنا سازیێن حکوومەتێ ژ ئالیێ سەرۆکوەزیرێ ھەرێما کوردستانێ ڤە، دەزگەھێ خێرخوازی یێ بارزانی ھەڤاھەنگیەکا تەمام ھەیە لگەل وەزارەتا تەندروستیێ و ناڤەندا ھەڤبەشا ھەڤاھەنگیا قەیرانان و ئالیێن دنێن پێوەندیدار.

حاجی بال کشاند سەر ئامادەباشیێن تیمێن دەزگەھێ خێرخوازی یێ بارزانی ژ بۆ ئالیکاریا زیان ڤێکەتیێن ئەردھەژێ یێن ل رۆژئاڤایێ کوردستانێ و گۆت: “ھەر رێیەک ھەبە، تیمێن مە دێ خوە بگھینن ناڤچەیێ و ئالیکاریێن پێویست پێشکێشی زیان ڤێکەتیێن وێ دەرێ بکن، کو نھا ئەم ب تەمامکرنا رێکارێن ئیداری مژوولن، دا کو ئەم ژ خالا سینۆری یا ناڤبەرا ھەرێما کوردستانێ و رۆژئاڤایێ کوردستانێ دەرباس ببن.”