ژ بەر کێمبوونا کارینێن بزیشکی و تیمێن هاوارهاتنێ، هەژمارا قوربانیێن ئەردهەژێ ل عەفرین و هەموو هەرێمێن دن یێن سووریێ زێدە دبە.
رەوانگەها سووری یا مافێن مرۆڤان بەلاڤ کر، هەژمارا قوربانیێن ئەردهەژێ هەتا نها گهشتیە 2150 کەسان، ژ وان 1062 کەس ل دەڤەرێن رێژیمێ نە و 1088 کەس ژی ل عەفرینێ و دەڤەرێن دن یێن د بن کۆنترۆلا ئۆپۆزیسیۆنا سووریێ دە نە، هەر وها زێدەتر ژ 2 هەزار کەسان ژی بریندار بوونە.
سبەها 6ێ سباتا 2023ان ل ناڤچەیا پازارجکا مەرەشێ 2 ئەردهەژێن ب هێزا 7،7 و 7،6 روو دابوون. ئەردهەژ ل باژارێن رۆژئاڤایێ کوردستانێ و سووریێ هەست پێ هاتە کرن و هەژمارەک مەزن ژ ئاڤاهیان هلوەشیان و وەلاتی بوون قوربانی.
ل گۆری زانیاریێن ژ عەفرینێ کەتنە دەستێ ک24ێ، ل عەفرین، گوند و ناڤچەیێن وێ هەژمارەک مەزن ژ خانی و ئاڤاهیان هلوەشیان، ب تایبەت ل باژارۆکێ جندرێسێ کو دۆرێن 50 ئاڤاهی و خانی هلوەشیانە و هەتا نها دۆرێن 100 کەسان جانێ خوە ژ دەست دانە و ب دەهان کەس ژی د بن کاڤلان دە ئاسێ مانە.
هەر وها رەوانگەهێ گۆت، هەژمارا زێدە یا قوربانیان ژ بەر کێمبوونا کارینێن تیمێن بزیشکی، کێمبوونا پێدڤیێن هاوارچوونێ و دەرمانانە. رەوانگەهێ بانگ ل ئالیێن ناڤدەولەتی کر ژی، بلەز دەستوەردانێ ژ بۆ رزگارکرنا برینداران و رووبرووبوونا کارەساتا مرۆڤی بکن.
هەر د ڤێ دەربارێ دە ژی، رێخستنا عەفرینێ یا پارتیا دەمۆکراتا کوردستانێ – سووریە (په‌ده‌كه-سێ) ژ بۆ ئالیکاریا زیاندیتیێن ئەردهەژێ یێن ل هەرێما عەفرینێ بانگ ل رایا گشتی و رێخستنێن مرۆڤی و وەلاتان کر.
رێخستنا عەفرینێ یا په‌ده‌كه-سێ د بانگەوازیا خوە دە گۆت: «ب ناڤێ قوربانیێن کو هین د بن کاڤلان دەنە و برینداران، ب ناڤێ هەزاران ژن و زارۆکێن کو ل ئەردێ رادزێن و ئاسمان بانێ وانە و ب ناڤێ دایکێن دلشەوتی، ئەم بانگ ل وە دکن کو گیانێ هەر کەسی رزگار بکن و هەموو تشتێن پێویست ژ بۆ زیاندیتیێن ڤێ کارەساتا کو ب سەرێ نیشتەجهێن هەرێما عەفرینێ و ب تایبەتی باژارۆکێ جندرێسێ دە هاتیە، پێشکێش بکن».
