ئه‌نجومه‌نا وه‌زیرێن هه‌رێما كوردستانێ ئیرۆ جڤیا و بریار دا كامپانیایه‌كه به‌رفه‌رهـ ژ بۆی ئالیكارییا زیاندیتیێن ئه‌ردهه‌ژێ یێن ل تركیێ و سووریێ بێ راگهاندن.
ل ده‌ستپێكا جڤینێ، سه‌رۆكوه‌زیر مه‌سروور بارزانی، سه‌رساخی و هه‌ڤخه‌مییا هه‌رێما كوردستانێ ژ بۆی كه‌سوكار و مالباتێن زیاندیتیێن ئه‌ردهه‌ژێ یێن هه‌ردو ولاتێن تركیه و سووریێ دیار كر و دوپات كر كو هه‌رێما كوردستانێ، وێ ل گۆری كارینێن خوه هه‌موو ئالیكارییه‌كه پێویست پێشكێشی زیاندیتیێن ڤێ كاره‌ساتێ بكه.
هه‌ر وها گۆت: ژ بۆی ڤێ ئارمانجێ ژی رۆژێن بۆری یه‌كه‌م كاروانێ ئالیكاریێ گهیشت باكورێ كوردستانێ و پێڤاژۆ وێ بدۆمه.
سه‌رۆكوه‌زیر گۆ كو ته‌دبیر هاتنه گرتن كو ئالیكاری ژ بۆی رۆژئاڤا كوردستانێ ژی بێن شاندن.
د ڤێ ده‌ربارێ ده ئه‌نجومه‌نا وه‌زیران بریار گرت كو كامپانیایه‌كه به‌رفه‌ره‌هـ یا ئالیكارییان ده‌ست پێ بكه و پارێزگار و ئیداره‌یێن سه‌ربخۆ یێن هه‌رێما كوردستانێ، ژ بۆی ڤێ كامپانیایێ راسپاردن.
