دەزگەها خێرخوازیا بارزانی: ئەم دێ ئالیکاریێ بشینن عەفرینێ

BFC-Barzani-efrin-earthquak

پشتی دو ئەردهەژێن کو ناڤەندا وان مەرەشا باکورێ کوردستانێ یە، ل رۆژئاڤایێ کوردستانێ و سووریێ زێدەتری 2 هەزار کەسان ژیانا خوە ژ دەست دانە و ب هەزاران کەس ژی بریندار و بوونە، دەزگەها خێرخوازیا بارزانی کو ئالیکاریان دگهینە پارێزگەهێن باکورێ کوردستانێ و ترکیێ، ژ بەر ئاستەنگیان نکارە ئالیکاریان بگهینە زیاندیتیێن ئەردهەژێ یێن رۆژئاڤایێ کوردستانێ.

سەرۆکێ دەزگەها خێرخوازیا بارزانی مووسا ئەحمەد ژ رووداوێ رە راگهاند کو ژ بەر هەبوونا گرووپێن چەکدار و هن سەدەمێن دن نکارن ئالیکاریێ بگهینن هەرێمێن ئەردهەژێ یێن ل سووریە و رۆژئاڤایێ کوردستانێ.

ئەحمەد ئانی زمان کو ئەو ئامادەنه‌ ل کودەرێ هەوجە هەبە ئالیکاریان بگهینن وان دەران و گۆت «حکوومەتا هەرێما کوردستانێ دێ ئیرۆ پلانێن خوە یێن کۆمکرن و گهاندنا ئالیکاریان بۆ هەموو ناڤچەیێن ئەردهەژێ راگهینە، ئالیکاریێن هاتن کۆمکرن ژ بۆ ترکیە و پارێزگەهێن کوردان هاتن شاندن، ب هەمان ئاوایی وێ ژ ور ژی بگهین عەفرینێ ژی».

دو ئەردهەژێن ب هێزا 7.7 و 7.6 کو ناڤەندا وان مەرەشا باکورێ کوردستانێ بوو باندۆرەکە مەزن ل رۆژئاڤایێ کوردستانێ و سووریێ ژی کرن. ل عەفرینا کو وێرانی لێ گران بوو، ب تایبەت ل ناڤچەیا وێ یا جندرێسێ نێزی 300 کەسان ژیانا خوە ژ دەست دا، ب هەزاران کەس ل بەندا ئالیکاریێ نە.

رایەدارێن ده‌زگه‌ها خێرخوازیا بارزانی ل سەر گهاندنا ئالیکاریان ژ بۆ رۆژئاڤایێ کوردستانێ و  سووریێ دبێژن: «مخابن هەلوێستا مە وسایە کو ژ بۆ خێرخوازەکی وەک مە ژی پر زەحمەتە کو خوە بگهینە ور، ژ بەر کو ئەگەر ئەم ژ هەرێما کوردستانێ دەرکەڤن، دڤێ ئەم پێوەندی ب رایەدارێن سووریێ رە بکن، گەر ئەم ب ئاوایەکی دن بچن، پێویستە ب کۆمێن چەکدار رە تێکلی داینن، لێ ئەم دکارن ژ ترکیەیێ بچن ئەفرین و جندرێسێ، ژ بۆ کو ئەم ئالیکاریان بگهینن عەفرین و جندرێسێ ئەم د ناڤ تێکلیان دە نە، پشتگری و مالزەمە ئامادەنە و ئەکیب ژی ئامادەنە، هایا مە ژێ هەیە کو خەلک ل ور د رەوشەکە پر خەراب دە نە».

پوستێن ھەمان بەش