سەرکردایەتیا پارتیا دەمۆکراتا کوردستان- سووریێ (پەدەکە-س)ێ ل ھەرێما کوردستانێ کەمپینەکا کۆمکرنا ئالیکاریان ژ بۆ زیاندیتیێن ئەردھەژا عەفرین و جندرێسێ راگھاند.
سەرکردایەتیا (پەدەکە-س)ێ ل ھەرێما کوردستانێ دوھی ل ھەولێرێ د کۆنفەرانسەکا رۆژنامەڤانی دا راگھاند، ژ بۆ پشتگریا ل گەلێ مەیێ ل عەفرینێ و جندرێسێ یێن کو گەلەک زیانێن جانی و مادی ژ ئەنجاما ئەردھەژێ دیتنە، ئەو ژ ئیرۆ 9ێ شوباتێ ڤە دەست ب کەمپینەکاە کۆمکرنا ئالیکاریان ژ بۆ زیاندیتیێن ئەردھەژێ دکن.
ئەندامێ کۆمیتا ناڤەندییا پەدەکە-سێ نووری بریمۆ گۆت، ئەردھەژا کو روو دایە، کارەساتەکا مرۆڤی ل پشت خوە ئانیە، ب سەدان خانی و ئاڤاھی ھلوەشیانە، ب سەدان کەس د بن کاڤلان دا شەھید بوونە، ب سەدان کەس ژی د بن کاڤلان دا ئاسێ مانە و خەباتێن ژ بۆ دەرخستنا وان بەردەوامن.
نووری بریمۆ گۆت ژی، ب دەهان هەزار کەس ژ بەر کو خانیێن وان ب تامامی یان ژی بەشەک ژێ ھلوەشیانە، بێ جھ و وار مانە و بەشەک ژ وان د ڤێ وەرزا زڤستان و سەرمایێ دا، ل دەرڤە دمینن و پێویستیا وان ب ئالیکاریێن بلەز ھەنە.
ھەر وھا دەستنیشان کر، ئەڤ کارەسات ژ شیانێن وەلاتەکی مەزنترە، ژ بەر وێ ئەو وەک پەدەکە-سێ چ ژ دەستێ وان بهێت دێ بکن. ھەر وھا نووری بریمۆ بانگ ل جڤاکا ناڤدەولەتی و رێخستنێن مرۆڤی ژی کر کو پشتگریا گەلێ عەفرینێ و جندرێسێ بکن، ژ بەر کو رێژیما سووریێ ل ھەمبەر ڤێ کارەساتێ ب ئەرکێ خوە رانابە و ترکیێ ژی ب ئەنجام و زیانێن ئەردھەژا ل وی وەلاتی روو دایە مژوولە.
سپیدەیا 6ێ شوباتا 2023یێ ل ناڤچەیا پازارجخا مەرەشێ 2 ئەردھەژێن ب ھێزا 7.7 و 7.6٧،٦ روو دابوون. باندۆرا ئەردھەژێ ب ئاوایەکی مەزن ل ھەرێما عەفرینێ و ب تایبەت ل ناڤچەیا جندرێسێ بوو کو ب دەھان خانی و ئاڤاھی ھلوەشیان و ب ھەزاران کەسان جانێ خوە ژ دەست دانە و بریندار بوونە.
