ل ژێر رێنمایێن سەرۆکوەزیرێ ھەرێما کوردستانێ مەسروور بارزانی و سەرۆکێ دەستەیا دامەزرێنەرا دەزگەھێ خێرخوازی یێ بارزانی، تیمێن رزگارکرنێ و کاروانێن وێ یێن ئالیکاریێ، ژ بۆ ئالیکاریا زیاندیتیێن ئەردھەژێ، بەر ب باکورێ کوردستانێ و ترکیێ ڤە ب رێ کەتن.
پشتی ئەردھەژا ل باکورێ کوردستانێ و ترکیێ، تیمەکا پەروەردەکری یا دەزگەھێ خێرخوازییێ بارزانی ب ھەموو پێدڤیێن پزشکی ڤە گھشتە ترکیێ، ژ بۆ ئالیکاریا زیاندیتیێن ئەردھەژێ، کاروانێ یەکەم ژی ژ 15 ئۆتۆمۆبیل و 50 کارمەندێن رزگارکرنێ پێک ھاتبوو.
دەزگەھێ خێرخوازی یێ بارزانی راگھاند، پشتی بداویھاتنا پرۆسەیا ئیداری ل خالێن سینۆری یێن ناڤبەرا ھەرێما کوردستانێ و (باکورێ سووریێ) دا، تیمێن وێ ئامادە نە کو ژ بۆ ئالیکاریا زیاندیتیێن ئەردھەژێ بشینن سووریا و رۆژئاڤایێ کوردستانێ.
د راپۆرا دەزگەھێ خێرخوازی یێ بارزانی دا ھاتیە، تیمێن تەندورستیێ یێن ژ بۆ ترکیێ ھاتنە شاندن، ژ ستافەک پزشکی یێ پسپۆریێن جودا، ئامبوولانس و پێویستیێن تەندورستیێ پێک تێ. کارێ وان یێ رۆژانە دەرمانکرنا برینداران، دابینکرنا دەرمان و ڤەگوھەستنا برینداران بۆ نەخوەشخانەیان ب ئامبوولانسێ یە.
ھەر وھا تیما دابەشکرن و رزگارکرنێ یا دەزگەھێ خێرخوازی یێ بارزانی ژ کادرۆیێن پەروەردەکری پێک تێ کو د وارێ ھاوارھاتن و رزگارکرنێ دا پەروەردەیا پێویست وەرگرتنە، ژ بۆ پشتەڤانیا تیما وەزارەتا ناڤخوەیا حکوومەتا ھەرێما کوردستانێ. ھەر وھا تیما دابەشکرنێ یا دەزگەھێ خێرخوازی یێ بارزانی ئامادەیە ئالیکاریان ل جھێ بوویەرێ ژی بەلاڤ بکە.
