وه‌قفا بارزانی ل عه‌فرینێ.. ئالایێ كوردستانێ، چه‌ته و په‌كه‌كه
ئالیکاریێن دەزگەها خێرخوازی یا بارزانی گهیشتن باژارێ عه‌فرینێ یێ رۆژئاڤایێ کوردستانێ، شێنیێن عه‌فرینێ ب ئالا كوردستانێ و گۆتنا بژی كوردستان پێشوازی ل ڤێ هه‌نگاڤا مرۆڤایه‌تی یا وه‌قفا بارزانی كرن.
دوهـ رۆژل ئینی 10ێ سباتا 2023ان، ئالیکاریێن دەزگەها خێرخوازی یا بارزانی گهیشتن باژارێ عه‌فرینێ یێ رۆژئاڤایێ کوردستانێ، سەرۆکێ دەزگەها خێرخوازی یا بارزانی مووسا ئەحمەد راگهاند: «سەرۆکوەزیر مەسروور بارزانی فەرمان دا کو ئالیکارییا زیاندیتیێن ئەردهەژا سووریێ و رۆژئاڤایێ کوردستانێ بکن، ئەم ل هەر دەرێ خزمەتکارێ گەلێ خوە نە و بێی جیاوازی ئەم ئالیکاریا هەر کەسی دکن».
سەرۆکێ دەزگەها خێرخوازی یا بارزانی مووسا ئەحمەد ئەشکەرە کر: «خەلکێ رۆژئاڤایێ کوردستانێ گەلەک ب گەرمی پێشوازی ل مە کر و ئەم سۆز ددن، هەر چ ژ دەستێ مە وەرە ژ بۆ ئالیکاریکرنا زیاندیتیێن ئەردهەژێ دکن».
هەروها دەستنیشان کری قەبارەیا ئەردهەژێ مەزنە و «دەزگەها خێرخوازی یا بارزانی دێ ل عه‌فرینێ بمینە».
مووسا ئەحمەد هەروها ئەشکەرە کر: «مە نێزیکی 250 تۆن کەلوپەلێن ئالیکاریێ ئانینە رۆژئاڤایێ کوردستانێ».
ده‌ربارێ گهیشتنا ئالیكاریێن وه‌قفا بارزانی ژ بۆی عه‌فرینێ، عه‌بدولره‌حمان مسته‌فا سه‌رۆكێ حكوومه‌تا ده‌مكی یا وێ ده‌رێ سپاسییا سه‌رۆك بارزانی كر ژ بۆ كو د ل په‌ی گازییا گه‌لێ عه‌فرینێ هات و ئالیكاری ژ بۆی زیاندیتیێن عه‌ردهه‌ژێ شاندن.
ئالا كوردستانێ ل عه‌فرینێ، چه‌ته‌یێن تركیێ و په‌كه‌كه!
شێنیێن عه‌فرینێ ب جۆشه‌كه مه‌زن پێشوازی ل كاروانێ وه‌قفا بارزانی یا ئالیكارییان كر، وان ئالا كوردستانێ بلند كرن و ب گۆتنا بژی بارزانی ئه‌ڤ هه‌نگاڤا مرۆڤایه‌تی یا سه‌ركردایه‌تییا باشوورێ كوردستانێ پێشوازی كرن.
ل گۆری دیمه‌نێن كو ژ بۆی داركامازی هاتنه شاندن، شێنیێن عه‌فرینێ ب ده‌هان ئالایێن كوردستانێ بلند كرن و ت كه‌سی، نه ژ چه‌ته‌یێن تركیێ و نه‌ژی ت هێزه‌كه دن یا كو عه‌فرین داگیر كرنه پێشی ل بلندكرنا ئالا كوردستانێ نه‌گرت.
ئه‌ڤ یێك سه‌ردانا شاندا پارلمه‌نتۆیا كوردستانێ ل بیرا مرۆڤ تینه وه‌ختا ل 11 سباتا سالا 2018ان ده‌رباسی عه‌فرینێ بووین و خوه‌ستن داخویانیه‌كه چاپه‌مه‌نیێ بدن رۆژنامه‌ڤانان، چه‌كدارێن په‌كه‌كێ یێن وێ ده‌مێ ل عه‌فرینێ نه‌هشتن ئالا كوردستانێ ل سه‌ر ماسه‌یا پرێسكۆنفه‌رانسێ بێ دانین و ئالا ژ ور راكرن.
ئیرۆ ژی و پاش ده‌رباسبوونا 5 سالان شێنیێن عه‌فرینێ ب قێرینا گۆتنێن بژی كوردستان، بژی بارزانی و هلدانا ئالایێ پیرۆزێ كوردستانێ ل ناڤه‌ندا عه‌فرینێ، پێشوازی ل وه‌قفا بارزانی كرن.
ب كورتاسی بێ رێزییا كو وێ پارتییا ناڤێ كوردستانێ ل خوه كری ئانگۆ ((په‌كه‌كێ)) ب ئالایێ كوردستانێ كری، چه‌ته‌یێن ده‌وله‌تێن داگیركه‌ر نه‌كری یه.
