ئەنجوومەنا نشتمانی یا کورد ل سووریێ (ئەنەکەسێ) بریار دا بارەگەھێن خوەجھی یێن ئەنەکەسێ ل عەفرین و جندرێسێ ڤەکە و رۆلا ئەنەکەسێ ل وێ ھەرێمێ ئەکیتڤ بکە.
ئەنەکەسێ ئیرۆ د داخویانیەکێ دا راگھاند، ئەنەکەسێ رۆژا 17ێ سباتا 2023یێ ل باژارێ قامشلۆ جڤینا خوەیا ئاسایی پێک ئانی و تێ دا ل سەر رەوشا وێرانکەرا ئەردھەژا کو ل ھەرێمێن کوردی ل باکور و رۆژئاڤایێ کوردستانێ و ب تایبەت ل عەفرین و جندرێسێ روو دایە راوەستیا کو د ئەنجامێ دا ب دەهان هەزار کەسان جانێ خوە ژ دەست دان و بریندار بوون و ھەژمارەکە مەزن ژ خانی، ئاڤاھی، رێ و پر ھلوەشیان.
د جڤینێ دا باسی کارێن ئەنەکەسێ یێن د ڤی واری دا ھاتنە کرن، ھات پێشکێشکرن، کو دێ نامە ژ بۆ نەتەوێن یەکگرتی و حکوومەتێن گەلەک وەلاتان هێت شاندن و بانگ ل وان کریە کو ئالیکاریێن پێویست و تیمێن رزگارکرنێ پێشکێش بکن و ڤان دەڤەران وەک دەڤەرێن وێرانبوویی ب ناڤ بکن، تا کو ئالیکاریێن ناڤدەولەتی ژ بۆ بێن کرن.
ھەر وھا ئەنەکەسێ سپاسیا ھەرێما کوردستانێ، سەرۆک بارزانی و دەزگەھا خێرخوازییا بارزانی کر کو ب ھاوارا زیاندیتیێن ئەردھەژێ چوونە، ب تایبەتی ل عەفرین و جندرێسێ.
ئەنەکەسێ د جڤینا خوە دە بریار دا، بارەگەھێن خوەجھی یێن ئەنەکەسێ ل عەفرین و جندرێسێ بێن ڤەکرن و رۆلا وان ل ھەرێمێ بهێت ئەکیتڤکرن، ژ بۆ کو بکارن ئالیکاریا زیاندیتیان بکن، زیانێن چێبوونە و بنپێکرنێن کو باندۆرێ ل وان دەڤەران تێن کرن بەلگە بکن.
