سەرۆک مەسعوود بارزانی ل سەلاحەدین پێشوازیا شەھزادەیا بەدرخانیان سینەمخان بەدرخان کر. سینەمخان بەدرخان دەربارێ ھەڤدیتنێ دا راگھاندیە، کو وێ ئەو ئالا کوردستانێ یا کو وەک ئەمانەت ل جەم وێ بوویە، رادەستی سەرۆک بارزانی کریە.
د ئەکوانتێ خوە یێ فەیسبۆکێ دا سینەمخان بەدرخان راگھاند، کو رۆژا شەمبیێ سەردانا سەرۆک مەسعوود بارزانی کریە و ئەمانەتەک 104 سالی رادەستی وی کریە.
شەھزادەیا بەدرخانیان سینەمخان بەدرخان وێنەیێ ھەڤدیتنا خوە یا لگەل سەرۆک بارزانی بەلاڤ کریە و دەربارێ ھەڤدیتنێ دا پەیامەک نڤیسکی وەشاندیە. د پەیاما خوە دا، سینەمخان بەدرخان ژ بەر پێشوازیا گەرما ل وێ و ھەروھا وەرگرتنا ئەمانەتا 104 سالی ژ دەستێ وێ سپاسیا سەرۆک بارزانی کریە.
سینەمخان بەدرخان گۆتیە: “ئیرۆ پشتی 104 سالان ل سەر دالقاندنا ڤێ ئالای ژ ئالیێ باپیرێ من میر ئەمین عەلی بەدرخان و ھەڤالێن خوە ڤە، من ئەو ئالا رادەستی برایێ خوە و رێبەرێ تەڤگەرا ئازادیا کوردستانێ سەرۆک مەسعوود بارزانی کر کو ل دەشت و چیایێن کوردستانێ بلند بکە. ئەز سپاسیا خوەدێ دکم کو من کاری ڤێ ئەمانەتێ رادەست بکم و گەلەک سپاسیا برایێ برێز سەرۆک مەسعوود بارزانی دکم، ژ بۆ وێ پێشوازیا گەرم و مێڤانپەروەری و وەرگرتنا ڤێ ئەمانەتا پیرۆز.”
سینەمخان بەدرخان نەڤیا ئەمین عالی بەدرخان کەچا جەلادەت عالی بەدرخان و رەوشەن بەدرخانە. سینەمخان بەدرخان ل پایتەخا ھەرێما کوردستانێ ل ھەولێرێ دژیت.
