ژ ئالیێ رێڤەبرێن دەزگەھا خێرخوازیا بارزانی ڤە ب داخویانیەکێ ھات راگھاندن کو د ناڤ 15 رۆژێن بۆری دا ل باکور و رۆژئاڤایێ کوردستانێ، ھەر وھا ل باژارێن ترکیا و سوریایێ، وان ئالیکاری گھاندنە 179 ھەزار و 905 کەسان.
ل گۆری داخویانیا کو ھات دایین، تیمێن دەزگەها خێرخوازی یا بارزانی د 15 رۆژان دا زێدەتری 84 ھەزار دانێن خوارنێن گەرم، 43 ھەزار بەتانی، دۆشەک و بالیف، 45 ھەزار سێت ئاڤا ڤەخوارنێ، 19 ھەزار پاکێتێن خوارنێ، 20 ھەزار خوارنێن فاست فۆد، 6 ھەزار جل و بەرگ، 3215 کۆن، 8 ھەزار قوتیێن شیری، 4 ھەزار تەشت و ئالاڤێن دەرمانکرنێ، 9 ھەزار سۆبە و پێویستیێن کو ژ بۆ زارۆکێن زیاندیتی پێدڤی نە، گھاندنە بەر دەستێن زەرەرمەندان.
ھەر وھا ھات ئەشکەرەکرن کو تەڤاھیا ئالیکاریێن کو ل ھەرێمێن ئەردھەژان ھاتنە بەلاڤکرن، ژ بۆ 35 ھەزار و 440 کەسێن ل دیلۆکێ، 23 ھەزار و 445 کەسێن ل سامسونێ، 9 ھەزار و 70 کەسێن ل رھایێ، 9 ھەزار کەسێن ل ئەدەنەیێ، 44 ھەزار و 580 کەسێن ل مەرەشێ، 29 ھەزار کەسێن ل دیاربەکرێ، 22 ھەزار و 656 کەسان ل عەفرینێ ئالیکاری ھاتیە دایین.
پشتی ئەردھەژێن ناڤەندا وان ل مەرەشێ، ب سەرپەرشتیا سەرۆکوەزیرێ ھەرێما کوردستانێ و سەرۆکێ دەستەیا دامەزرینەرا دەزگەھا خێرخوازییا بارزانی مەسروور بارزانی، تیمێن ھاوارچوونێ و کاروانێن ھاوارچوونێ ژ بۆ ئالیکاریێ بگھینن زەرەرمەندێن ئەردھەژان، بەرێ خوە دابوون ھەرێمێن ئەردھەژێ و پشتی بداویبوونا ئەرکا خوەیا مرۆڤی، ڤەگەریابوون ھەرێما کوردستانێ.
