دەما چەند رۆژانە شاندەکی پارلامەنتۆیا هەرێما کوردستانێ کو ژ پارلامەنتەرێن پەدەکێ، یەنەکێ و بزاڤا گۆران پێک تێ ل ولاتێ بریتانیایێ یە، ئەڤ شاند ژ بۆی جڤینا ب هەژمارەک لیژنەیێن پارلامانتۆیا بریتانیایێ ل ڤی ولاتی یە، لێ ئەڤ یەک ب دلێ پەکەکێ و دۆڤەلانکێن وێ نەبوو، ژ بەر کو پەکەکە ل دژی هەر کەس، ئالی و تشتەکی یە کو د بەرژەوەندا باشوورێ کوردستانێ دە بە، ئەڤ جارە ژی پەکەکێ دیسا ئەندام و ئالیگرێن خوە د بن ناڤێ رۆژنامەڤان و چالاکڤانێن سڤیل شاندن کو ل دژی ئەندامێن ڤێ شاندا هەرێما کوردستانێ بسەکنن و هەقارەتێ ل وان بکن.

ئێدی ب سایا سەرێ پەکەکێ هەقارەت و ئێریشکرنا ل سەر شاندێن حکوومی یێن ژ هەرێما کوردستانێ سەرەدانا ولاتێن ئەورۆپایێ دکن پڕ زێدە بوویە، ئەڤ نە جارا یەکەمینە ئەڤ یەک تێ کرن، پەکەکێ پێش نها ژی چەندین جارا ئێریشی شاندێن ژ هەرێما کوردستانێ، کەساتی و بەرپرسێن بلند یێن حکوومەتا هەرێمێ کریە، ب تایبەت ل بریتانیایێ.

پەکەکە دخوازە ب ڤان کارێن خوە یێن دوور ژ ئەخلاق جەوەکی ووسا ئاڤا بکە کو ت بەرپرس و شاندەکی ژ باشوور سەرەدانا ولاتێن ئەورۆپایێ نەکە، نە ژ بۆی کارێن فەرمی و نە ژ بۆی ت کارەکی دن، هەر وەها دخوازە ووسا ب رایا گشتی یا جیهانی بدە فێمکرن کو بەرپرسێن هەرێما کوردستانێ ژ ئالیێ گەل ڤە نایێن قەبوولکرن و ئەو زۆردارن.

پەکەکێ ئەڤ یەک ب پارلامەنتەرێ بزاڤا گۆران “یاسین خزر” ژی کر

مژارا هەقارەتکرنا ب “یاسین خزر” پارلامانتەرێ بزاڤا گۆران و پاشێ بریندارکرنا کەسێ کو هەقارەت ب یاسین خزر کربوو یێ ب ناڤێ “ئیسماعیل سیان” د سۆسیال میدیایێ دە ب ئاوایەکی بەرفرەهـ جیهـ گرت، ژ بەر کو ترۆلێن پەکەکێ ووسا د سۆسیال مەدیایێ دە پارڤە کر کو پشتی “چالاکیەک” ل دژی پارلەمەنتەرێ بزاڤا گۆران ل بەریتانیایێ ژ ئالیێ ئیسماعیل سیان ڤە هاتیە ئەنجامدان، ڤی پارلەمەنتەرێ بزاڤا گۆران ب ئالیکاریا 16 کەسێن دن کەسێ ب “چالاکیێ” رابووی رەڤاندیە و پشترە ل وی خستیە و ب کێران ئەو بریندار کریە! لێ بەلێ ت ڤیدەئۆ یان ژی بەلگەیەک ل سەر ڤێ یەکێ پارڤە نەکر، ب تەنێ وەکە هەرجار ئاخافتێن خوە وەکە بەلگە بەرچاڤکرن.

پەکەکە ل ئەورۆپایێ ب رێیا یەکینەیا ئیستیخباراتا خوە ئانکو ناڤەندا لەکۆلینێن پۆلەتیک (NLP) کو ناڤەندا وێ یا سەرەکە ل قەندیلێ یە و پشتی کۆنگرەیا حەفتەمین یا پەکەکێ ل باشوورێ کوردستانێ هاتیە دامەزراندن و راستەراست ژ ئالیێ جەمیل بایک ڤە تێ برێڤەبەرن سەرپەرەشتیا ڤان کەس و کۆمێن ل دژی باشوورێ کوردستانێ دکە و وان ئاراستە دکە. ئەرکا سەرەکە یا ڤێ ناڤەندا پەکەکێ بدەستخستنا ئاگاهیێن ئیستیخباراتی د بەرژەوەندا پەکەکێ دە یە. هەر وەها ئیستیخباراتا پەکەکێ سەرپەرەشتیا تەڤ سازی و دەزگەهێن پەکەکێ دکە، 95% ژ کادرۆیێن د ڤێ ناڤەندا ئیستیخباراتا پەکەکێ دە کار دکن ژ باکورێ کوردستانێ نە، NLP کاریە سازییا ئیستیخباراتا یەنەکێ ژی کۆنترۆل بکە.

یەک ژ کارێن دن یێن NLP ل ئەورۆپایێ چێکرنا ئەنجوومەنەکی یە ب ناڤێ “ئەنجوومەنێ چالاکڤانێن کورد ل ئەورۆپایێ” کو کەسێن هەری دیار یێن ڤێ ئەنجوومەنا دەستچێکری یا پەکەکێ “رەنجدەر مەغدید، مەکی ئامێدی و ئارام قادر”ن، کارێ سەرەکە یێ ڤێ ئەنجوومەنێ ژی تەشهیرکرن، هەقارەت و ئێریشێن مەدیایی یێن دوور ژ ئەخلاقە بۆ سەر کەسێن نە پەکەکەیێ و نێزی حکوومەتا هەرێما کوردستانێ یە، ئەڤ کەسانە ب ئاوایەکی سیستەماتیک و پلان بۆ دارشتی کار دکن، کەسێن د ڤێ ئەنجوومەنێ دە ژی د بن ناڤێ چالاکڤان و رۆژنامەڤان “چالاکیێن” خوە ئەنجام ددن، د دەمەکی دە کو ت یەک ژ وان نە چالاکڤانە و نە ژی رۆژنامەڤان، بەلکو ب تەنێ هن کەسێن نەخویندەوار و دژە کوردن کو ب ئاوایەکی بێئەخلاقانە د بەرژەوەندا پەکەکێ دە کار دکن.

گول دان پارلامەنتەرەکی و هێک گرتن پارلەمانتەرەکی دن

ژ بۆی کو خوە ب کەسێن تێگهشتی و ولاتپارێز بدن ناسکرن، ڤێ کۆمێ یەکەمجار دەستەکی گولان ب یەک ژ پارلامەنتەرێن کوردستانێ یێ ب ناڤێ زکری زێباری کو یەنەکە یە و کەسەکی نێزی پەکەکێ یە دان، لێ بەلێ پشترە چالاکڤانێ پەکەکێ یێ ب ناڤێ “ئیسماعیل سیان” ب رۆژ هەقارەت ب پارلامەنتەرێ کوردستانێ یاسین خزر کر، ب شەڤ ژی ووسا دا خویا کرن کو ڤی پارلامەنتەرێ کوردستانێ ب ئالیکاریا 16 کەسان ئێریشی وی کریە، ئەو رەڤاندیە و ب کێران بریندار کریە، یەکەمجار راگهاند ئەو ژ بۆی سەرتراشخانەیەکی هاتیە رەڤاندن، پشترە راگهاند ژ بۆی پارکەکی هاتبوو رەڤاندن، لێ ت بەلگە د دەستی وی دە تونە، یا راست ئەڤە کو وی ب خوە ب کێران خوە بریندار کریە تا کو یاسین خزر پێ تاوانبار بکە و ڤێ یەکێ وەکە بەلگەیەک ژ بۆی تەهدید و گەفا ل سەر خوە پێشکێشی دادگەهێ بکە هەیا کو بکارە ب ڤێ هنجەتێ مافێ پەنابەریێ ل بریتانیایێ ب دەست بخە.

ب کورتی، یا زەلال و ئەشکەرەیە کو پەکەکە و دۆڤەلانکێن وێ ل ت جی و دەمەکی خوە ژ ت کارەکی ب دوور ناگرن ژ بۆی دژاتیکرنا ستاتۆیا هەرێما کوردستانێ و رێڤەبەرێن ڤێ پەرچەیا ئازادکری یا کوردستانێ، ئەڤ ئێریشا مەدیایی یا دوور ژ ئەخلاق یا کو نها ل سەر ڤی پارلەمانتەرێ کوردستانێ یێ ژ بزاڤا گۆران تێ کرن ژی بەشەک ژ ڤێ پلانا پەکەکێ یا دژاتیکرنا کوردستانێ یە و نە ت تشتەکی دنە.