پارلامەنتەرێ بەرێ یێ پارتیا دەمۆکراتیکا گەلان (ھەدەپێ) و سەرۆکێ بەرێیێ شارەداریا باژارێ مەزن یێ مێردینێ ئەحمەد تورک دیار کر، ھەرێما کوردستانێ بەری ھەر کەسی ھات ئالیکاریا زەرەرمەندێن ئەردھەژێ و ژ بەر ڤێ یەکێ ئەو سپاسیا ھەرێما کوردستانێ دکە.
ئەحمەد تورک د ھەڤپەیڤینەکا تایبەت دا ژ بۆ کوردستان24ێ ل سەر ئالیکاریێن ھەرێما کوردستانێ ژ بۆ زیاندیتیێن ئەردھەژا باکورێ کوردستانێ و ترکیێ راگھاند: “ئەز ب خوە سپاسیا ھەرێما کوردستانێ دکم، رۆژا ئەولی ژ بۆ ئالیکاریێ بەری ھەر کەسی ھاتن کوردستانا باکور و باژارێن ھاتایێ، مەرەشێ، پازارجخێ و گھیشتن وێ دەرێ”.
تورک دیار کر: “مە دیت سەرۆک بارزانی ھێسر ژ چاڤێن وی دھات، ژ بۆ ڤێ ئەردھەژێ ھێسر ژ چاڤێن وی دھات. لێ ئەو کەسێن ترکیێ ئیرۆ دمەشینن، رێڤەبەریا ترکیێ دکن، ب راستی ئەو ئێش، مە د روویێ وان دە نەدیت.”
ئەحمەد تورک دەستنیشان کر: “دڤێت ھەموو گەل د رۆژێن وسا دا ببن ئالیکارێن هەڤ، د ناڤا گەلان دا چ نەیارتی، چ دژمناھی تونەیە، لێ دەستھلاتدار ئیرۆ د ناڤا گەلان دا نەیارتی، دژمناتی، خەرابی و نەباشی ئاڤا کرنە.”
ھەروھا دیار کر: “ئیرۆ ژ مێردین، ژ رھایێ، ژ ئامەدێ، ژ شرنەخێ، ھەموو جوانێن پارتیا مە، یێن سازیێن مە، رۆژا ئەولی ژ بۆ ئالیکاریێ چوون مەرەشێ، چوون ھاتایێ، چوون ئادیامانێ.”
