سەرۆک مەسعوود بارزانی ب بۆنەیا سالڤەگەرا راپەرینا سالا 1991ێ یا باشوورێ کوردستانێ پەیامەک بەلاڤ کر و تێ دە تەکەزی ل وێ یەکێ کر کو «راپەرینێ ئەو راستی ژ دۆست و دژمنان رە ئیسپات کر کو زلم و ترس ت جاری نکارە ڤینا ئازادیێ د دلێ گەلێ کوردستانێ دە ڤەمرینە».
سەرۆک بارزانی د پەیاما خوە دە گۆت: «ب هەلکەفتا 32 سالیا راپەرینا مەزنا گەلێ کوردستانێ، پیرۆزباهیێ ل مالباتێن سەربلندێن شەهیدان، پێشمەرگەیێن قەهرەمان، هەموو تێکۆشەر، ئازادیخواز، وەلاتپارێز و هەموو گەلێ کوردستانێ دکم».
سەرۆک بارزانی دا زانین، «راپەرین، ب سایا ئیرادەیا ئازادیا گەلێ کوردستانێ، قەهرەمانیا پێشمەرگە، پلانسازکرن و یەکرێزیا پارتیێن تەڤگەرا رزگاریخوازا کوردستانێ پێک هات. راپەرینێ ئەو راستی ژ دۆست و دژمنان رە ئیسپات کر کو زلم و ترس ت جاری نکارە ڤینا ئازادیێ د دلێ گەلێ کوردستانێ دە ڤەمرینە. راپەرین نرخ و ئارمانجێن بلند هلگرت، ژ بۆ گەلێ کوردستانێ ئازاد ببە و ژیانەکە وی یا سەربلند ل وەلاتێ وی هەبە».
سەرۆک بارزانێ د پەیاما خوە دە دبێژە: «د بیرانینا راپەرینێ دە، ب هەزاران سلاڤ ژ بۆ شەهیدێن راپەرینێ و هەموو شەهیدێن تەڤگەرا رزگاریخوازا کوردستانێ و ئەم تەکەزیێ ل سەر وێ یەکێ دکن کو قەوارەیا هەرێما کوردستانێ کو یەک ژ بەرهەمێن راپەرینا گەلێ کوردستانێ یە، دەستکەفتەکە دیرۆکی و گرانبوها یا گەلێ کوردستانێ یە. دڤێ ئەڤ دەستکەفتی بێ پاراستن و بهێزکرن و ب ت جاری نابە کار ژ بۆ لاوازکرن و نەهیشتنا نرخ و ئارمانجێن کو گەلێ کوردستانێ ژ بۆ وان سەری هلدایە، بێ کرن».
