د لێپرسینا ئەردهەژا 6ێ سباتێ دە 247 کەسێن د چێکرنا خانی و ئاڤاهیان دە خەمساری کرنە هاتن گرتن و ژ وان 93 بەلێندەرن.
پشتی ئەردهەژێن 6ێ سباتا 2023ان کو ل 11 پارێزگەهێن باکورێ کوردستانێ بوون سەدەما هلوەشینا ب دەهـ هەزاران ئاڤاهیان، ب بریارا وەزارەتا دادێ یا ترکیێ دەربارێ کەسێن کو د چێکرنا ئاڤاهیێن هلوەشیایی دە خەمساری کرنە، لێپرسین هاتبوون دەستپێکرن.
ل گۆر مەدیایا ترکیێ، 5ێ ئادارا 2023ان هەژمارا کەسێن گرتی کو د چێکرنا خانی و ئاڤاهیان دە خەمساریا وان هەبوویە گهشتیە 247 کەسان. ژ وان 93 بەلێندەر، 123 بەرپرسێن ئاڤاهیان، 13 کەس خوەدیێ ئاڤاهیان و 18 کەس ژی کەسێن کو د ئاڤاهیان دە گوهەرتن کرنە.
رۆژا 6ێ سباتا 2023ان دو ئەردهەژێن ب پلەیێن 7.7 و 7.6 کو ناڤەندا وان باژارێ مەرەشێ بوو، ل 11 پارێزگەهێن باکورێ کوردستانێ و ترکیێ،یێن مەرەش، دیلۆک، سەمسوور، رها، ئامەد، مەلەتی، کلیس، هاتای، ئۆسمانیە، ئەدەنە و خارپێتێ بوون سەدەما مرن و برینداربوونا ب دەهـ هەزاران کەس.
