سەرۆکێ ھەرێما کوردستانێ و میرێ ئێزدیان تەکەزی ل سەر گرنگیا بەردەوامیا گوھدانا ب رەوشا ئێزدیان و جێبەجێکرنا رێکەفتنا ئاساییکرنا رەوشا شنگالێ کرن.
ل گۆر مالپەرا سەرۆکاتیا ھەرێما کوردستانێ، سەرۆکێ ھەرێما کوردستانێ نێچیرڤان بارزانی پێشوازی ل میرێ ئێزدیان ل ھەرێما کوردستانا ئیراقێ میر ھازم تەحسین بەگ کر.
د جڤینێ دا رەوشا ئێزیدیێن ل کامپێن کۆچبەران، ل شنگال و دەرڤەیی وەلات ھاتە گۆتووبێژکرن و تەکەزی ل سەر بەردەوامیا پرۆسەیا رزگارکرنا ئێزیدیێن رەڤاندی، باشکرنا ژیانا رزگارکریان و چاوانیا ئالیکاریا وان ھات کرن.
ھەر دو ئالیان تەکەزی ل سەر گرنگیا بەردەوامیا گوھدانا ب رەوشا ئێزدیان و جێبەجێکرنا رێکەفتنا د ناڤبەرا حکوومەتا ھەرێما کوردستانێ و حکوومەتا فەدەرالا ئیراقێ دا یا ژ بۆ ئاساییکرنا رەوشا شنگالێ کرن، ژ بۆ کو خەلکێ ھەرێمێ ڤەگەرن جھێن خوە و ل سەر ئاستا ھەرێما کوردستانێ، ئیراق و جیھانێ ئالیکاری بێن کرن ژ بۆ ئاڤاکرنا شنگالێ و ناڤچەیێ ب گشتی.
نێچیرڤان بارزانی بەردەوامیا پشتەڤانیا ئێزدیان و پاراستنا مافێن وان ل ئیراق و ھەرێما کوردستانێ دوبارە کر. ھەروھا تەکەز کر کو پرۆسەیا رزگارکرنا رەڤاندیان و ئەشکەرەکرنا چارەنڤیسا وان دێ بەردەوام بە و ھەر چ پێویست بە ژ بۆ رزگارکرن و ئالیکاریا وان، دێ خەمساریێ نەکن.
ژ ئالیێ خوە ڤە، میرێ ئێزدیان سپاسیا نێچیرڤان بارزانی کر ژ بۆ پشتەڤانی و ئالیکاریێن وی یێن بەردەوام، ب تایبەتی ھەولێن وی یێن ژ بۆ رزگارکرنا رەڤاندیێن ئێزیدیان و بەرەڤانیا ل مافێن وان.
ئەنجامێن سەردان و ھەڤدیتنێن ڤێ داویێ یێن میرێ ئێزدیان لگەل پاپایێ ڤاتیکانێ و رایەدارێن وەلاتێن ئەورۆپا، ئیراق و ناڤچەیێ مژارەکە دنا ڤێ ھەڤدیتنێ بوو.
