رێخستنا هەنگاو یا مافێن مرۆڤان راگهاند کو سالا 2022ێ ده 245 چالاکڤانێن ژن یێن کورد ل ئیرانێ و رۆژهلاتێ کوردستانێ هاتنە دەستەسەرکرن و ژ وێ هەژمارێ 30 کەس ب تۆهمەتا چالاکیێن سیاسی و بەشداربوونا خوەپێشاندانان هاتنە جەزا کرن.
خوەپێشاندانێن چەند مەهێن بۆری کو پشتی مرنا ژینا ئەمینی 17/9/2022 ل باژارێ سەقزێ دەستپێ کرن، د وان دە ژنان رۆلەکی سەرەکی و پێشەنگ دیتن و دینامۆیا خوەپێشاندانان بوون. د خوەپێشاندانان دە هەژمارەکە بەربچاڤا ژنان هاتن کوشتن، بریندار بوون و هنەکان ژ وان ژی چاڤێن خوە ژ دەست دان.
رێخستنا هەنگاو ب هەلکەفتا 8ێ ئادارێ رۆژا جیهانی یا ژنان راپۆرەک ل سەر رەوشا ژنان بەلاڤ کریە و دبێژە: «21 ژن ژ بەر چالاکیێن سیاسی، 3 ژن ل سەر چالاکیێن سڤیل و د خوەپێشاندانان دە ژی 221 ژن هاتنە دەستەسەرکرن».
ل گۆر وێ راپۆرێ، ل پارێزگەها سنە 137 چالاکڤانێن ژن، ل پارێزگەها ئورمیێ 39، کرماشان 25، ئیلام 24 و ل پارێزگەهێن ئیرانێ ژی 20 چالاکڤانێن ژن هاتنە دەستەسەرکرن. ژ 8ێ ئادارا 2022 و هەتا 8ێ ئادارا 2023ێ هەری کێم 30 چالاکڤانێن ژن، ب تۆهمەتا تەڤگەرا سیاسی، بەشداربوونا خوەپێشاندانان و چالاکیێن سڤیل ب گشتی جەزایێ 77 سال و دوو مەهـ زیندان ل سەر وان هاتیە فەرزکرن.
جەزایێ دارڤەکرنێ ژی ل سەر دو چالاکڤانێن LGBTQ هاتیە فەرزکرن. هەر ل گۆر وێ راپۆرتێ، د سالا 2022ێ دە 25 ژن ل باژارێن جودایێن رۆژهلاتێ کوردستانێ هاتنە کوشتن. پرانیا وان ژ ئالیێ کەسوکارێن خوە ڤە هاتنە کوشتن و کوشتنا 5 کەسان ژ وان ل سەر نامووسێ بوویە.
